1. 6. 2023: Владыка Гучко припоминать собі 20 років єпіскопской службы
„Я єм світло про світ‟, – выбрав собі владыка за своє гесло.
Пражскый апостольскый екзарха, владыка Ладислав Гучко, в тых днях припоминать собі 20 років своёй єпіскопской службы. Рукоположеный на єпіскопа быв 31-го мая 2003-го року. Інформовав о тім портал Církev.cz. а наслїдно Петро Медвідь з лем.фм.
Владыка Ладислав народив ся 16-го фебруара 1948-го року в Пряшові, в родинї русиньского ґрекокатолицького священика. У 1966-ім роцї голосив ся на штудії на Кіріло-Методійску римокатолицьку богословску факулту в Братїславі.
Експеріменталный фізік
В тім часї была Ґрекокатолицька церьков у Чехословакії ілеґална, але і римокатолици мали лем єдну долену семінарію, а державов обмеджены квоты, кілько богословів можуть прияти. Тоты квоты были глубоко під граніцёв досправдовых потреб церькви.
Ладислава Гучка не прияли і так пішов штудовати експеріменталну фізіку на Природознавчу факулту Універзіты Павла Йозефа Шафарика в Кошіцях, де у 1972-ім роцї обгаїв дізертацію і здобыв дітул доктора природных наук (RNDr.).
З причіны свого реліґійного пересвідчіня не міг зістати робити на факултї, мусив глядати собі іншу роботу. У 1987-ім роцї здобыв на Высокій школї баньскій в Остраві тітул кандідата ґеолоґічных наук.
Кедь у 1989-ім роцї дішло в Чехословакії ку політічным змінам, дакілько місяців робив редактора в ґазетї Katolícke noviny, пак в роках 1990 аж 1991 быв выконным секретарьом Конференції єпіскопів Словакії.
Священик і єпіскоп
Но в тім часї про нёго одкрыли ся і можности, жебы міг сістематічно штудовати теолоґію. У 1992-ім роцї быв посланый до Рима на теолоґічны штудії на Папскый Латераньскій універзітї, котры закінчів у 2000-ім роцї докторатом. Темов ёго докторьской роботы были козмолоґічны ідеї у російскых реліґійных мыслителїв 19-го і 20-го столїтя.
Рукуположіня на священика прияв 30-го марца 1996-го року з рук крижевацького єпархы, владыкы Славоміра Мікловша.
Кедь у 2000-ім роцї вернув ся з Рима, зачав учіти доґматічну теолоґію на Теолоґічнім інштітутї в Кошіцях, рік быв і шпіруталом в Священьскій семінарії святого Карола Боромейского в Кошіцях.
Папа римскый Йоан Павел ІІ. Ладислава Гучка 24-го апріля 2003-го року призначів апостольскым екзархом про католиків візантійского обряду в Чеській републіцї, а єдночасно тітуларным єпіскопом орейскым. фґункції вычеряв першого пражского екзарху, владыку Івана Лявинця, котрый вже мав высокый вік. Як єпіскопске гесло собі владыка Ладислав выбрав: „Я єм світло про світ.“ (Йоан 8,12)
Єпіскопске рукоположіня прияв владыка Ладислав 31-го мая 2003-го року з рук владыкы Ґеорґія Джуджара.
Рукуположіня мало одбыти ся в Ґрекокатолицькім катедралнім соборї святого Клімента в Празї, но ґрупа україньскых екстремістів нарушыла тото торжество, і не хотїла нового єпіскопа-номінанта і цїлу святочну громаду впустити до собору.
Уж втогды были в Празї намагы дістати екзархат, котрый выникнув оддїлїнём од Пряшівской єпархії, і є ведженый доднесь у Ватіканї як екзархат русньскый, дістати під контролю Українцїв. Вшыткы участны пак перебрали ся до недалекого Римокатольцкого костела святого Салаватора, де торжество одбыло ся.
Одсвятковав юбілей
Владыка Ладислав у 2004-ім роцї габілітовал ся на доцента в области доґматічной теолоґії на Теолоґічній факултї в Кошіцях. В роках 2005 аж 2011 быв ґенералным секретарём Чеськой єпіскопской конференції. В тій є доднесь членом Комісії про навчаня віры і Комісії про католицьку выхову.
Владыка Ладислав ходить даколи і на засїданя Рады єрархів Ґрекокатолицькой митрополітной церькви на Словакії, хоць не є членом, але бере участь як гость.
Тот рік у фебруарї дожыв ся юбілею 75 років, і то вік, коли мусить подати єпіскоп Папови римскому свою резіґнацію. Папа єй може і не мусить прияти. Зато вкаже найблизшый час, ці владыка Ладислав буде далше служыти пражскым екзархом, або і на тій посаді прийде ку змінам.
Здрой: лем.фм., языкова і ґрафічна управа: АРК в СР. Фото: Луціє Горнікова
