1. 8. 2023: Архієпіскоп Кіріл Василь став папскым делеґатом про Сірійско-малабарьску церьков

Як інформує Пресовый центер Кошіцькой єпархії, кошыцькый єпарха – архієпіскоп Кіріл Василь, быв призначеный папскым делеґатом із особливыма правами про католиків Сірійско-малабарьской церькви в Індії, окремо в Архієпархії Енакулам-Анґамалі.

Вселеньскый Архієрей владыку Кіріла новов функціёв повірив у понедїлёк, 31-го юла 2023-го року. Архієпіскоп Кіріл Василь і далше зіставать кошіцькым єпархом.

Проблемы з реформов

Архієпархія Енакулам-Анґамалі в індійскім штатї Керала є позначена дакількорочныма непокоями з боку священиків і віруючіх, котры, окрім іншого, не суть согласны з літурґічнов реформов, пише Пресовый центер Кошыцькой єпархії.

На реформі іщі у 1999-ім роцї договорив ся Сінод єпіскопів, і была схвалена Папом римскым Франціском. Літурґічна реформа выходить із пожадавкы Другого ватіканьского собору, котра апелує на восточны католицькы церькви, жебы обновити первістны автентічны літурґічны і духовны традіції.

Спор в Сірійско-малабарьскій церькви в Індії є в тім, ці священик має одправляти літурґію обернутый тварёв ку людём або на выход ку престолу. Споминана церьков была в минулости златинізована, і священик служыть обернутый ку людём.

Кількостёв своїх віруючіх, котрых є понад 4 міліоны, є Сірійско-малабарьска церьков другов найвекшов восточнов католицьков церьквов. Єдночасно то найвекша церьков у Індії, котра своє походжіня має од апостола Томы, і заховлює восточно-антіохійску, значіть халдейску літурґічну дідовизну.

Главов церькви од 2011-го року є верьховный архієпіскоп Мор Джордж кардінал Аленхеррі.

Честь і знак довіры

Пресовый центерь Кошыцькой єпархії по призначіню архієпіскопа Кіріла Василя за папского делеґата позвідав ся владыкы, што тото менованя значіть про нёго особно, про Кошыцьку єпархію, і про церьков.

Призначіня за папского делеґата владыка обще означів за честь і знак довіры з боку Святїшого Отця. Як дале повів, даколи ся выменує делеґат, жебы тота особа репрезентовала Папу римского при даякій церьковній події. Но так само суть сітуації, коли делеґат є повіреный особливыма правами, жебы рїшыв конкретну проблему в дакотрій з містных церьквей, і то якраз припад владыкы Кіріла.

„Про Кошыцьку єпархію то значіть, же на даякый час буду мусити ділити свою увагу меджі властну єпархію і потребы Сірійско-малабарьской церькви в Індії,“ повів владыка, котрый вірить, же вдяка добрій командї сполупрацовників в Кошіцях буде годен реалізовати тото повірїня Вселеньского Архієрея такым способом, жебы то не огрозило нияк фунґованя Кошіцькой єпархії.

Владыка в найблизшых днях рихтує ся на дакілько тыжднїв одыйти до Індії, жебы зробити першу оцїнку напруженой сітуації. Припомянув, же Сірійско-малабарьску церьков в минулости навщівив дакілько раз, кедь іщі робив на Конґреґації про восточны церькви.

Владыка думать, же напружену сітуацію не мож рїшыти од стола в канцеларії, але посередництвом особной скушености, розговорів, оцїнїня сітуації на місцї.

„Аж по тій першій навщіві буду знати лїпше посудити, якы будуть далшы крокы, потребны на досягненя того цїля,“ закінчів архієпіскоп Кіріл Василь.

Петро МЕДВІДЬ, ЛЕМ.фм, языкова і ґрафічна управа: АРК в СР.