1. 8. 2023: Презентація обновленого журналу Отцюзнина

В суботу, 29-го юла 2023-го року, одбыла ся в ужгородьскім Центрї култур народностных меншын Закарпатя презентація першого чісла обновленого русиньского културно-белетрістічного журналу Отцюзнина.

Журнал выходив уж в минулости, од 2016-го до 2018-го року, но через складны условія, котры Русины на Підкарпатю мають, ёго робота была перервана. Теперь подарило ся обновити роботу редакції вдяка проф. Павлови Робертови Маґочіёви, котрый фінанчно забезпечів посередництвом фінанцій од меценатів друкованя журналу на два рокы, цїлково вісем выдань.

Отцюзнина

Наш підкарпатьскый русиньскый журнал Отцюзнина выходить як кватралник із тіражов 500 фалатків. Головным редактором є Юрій Шиповіч, председа Русиньского културолоґічного клубу.

Якраз тота орґанізація вєдно із Закарпатьскым областным науково-културолоґічным Обществом імени Александра Духновіча, котрого председом є Юрій Продан, суть выдавателями обновленого журналу. Журнал выдає ся на 40-ох сторінках, і обсягує як актулны темы, розговоры, так і русиньску історію, краєзнавство, етноґрафію, звычаї. Самособов, не хыбить ани сучасна література – проза і поезія.

Діскусія і підписаня договору

Подія, на котрій одпрезентовало ся перше по роках перервы выданя журналу, почало минутов тиха за недавно помершы русиньскы особности – Івана Туряницю, Михаіла Чухрана і Марію Ярчич.

Пак о новім выданю бісїдовав шефредактор журналу Юрій Шиповіч. По ёго словах приговорив ся і другый з выдавателів Юрій Продан. За тым проходила жыва і плодна діскусія, в рамках котрой участны оцїнёвали нововыданый журнал, але так само і подали конштруктівны пропозіції, што до будучіх чісел.

Слово в діскусії взяли Павел Роберт Маґочій, Володимір Фенич, молодый писатель Мигаль Чикивдя, Михаіл Белень, Євген Жупан – глава Народной рады Русинів Закарпатя, Віра Кобулей, Петро Медвідь, і далшы.

Наперек тому, же в діскусії нашли ся різны погляды, вшыткы оцїнили, же выдаваня журналу ся обновило і беруть то як важный елемент в розвитку русиньского руху на Підкарпатю. Радостнов новинов є і конштатованя главного редактора, же наперек дакількорочній перерві по оголошіню выданя нового чісла вказав ся великый інтерес о журнал меджі чітателями, котры цїле нове выданя властно такой розобрали.

На кінцю події быв пидписаный договор о сполупраці меджі Русиньскым културолоґічным клубом і орґанізаціёв Карпатьскый Русин, котрой председом є Василь Щербей.

Тїшыть нас, же і наперек тому, же іде война, Русины на Підкарпатю далше роблять на своїй ниві в можностях, котры теперь мають, і підкарпатьскый русиньскый рух вдяка актівным орґанізаціям продовжує.

Петро МЕДВІДЬ, ЛЕМ.фм, языкова і ґрафічна управа: АРК в СР.