1. 9. 2022: Продолжают ратувати цмонтір в Лабовій і першыраз памятникы в Чырній

Жебы сме могли быти собом, мусиме дбати і о цмонтері, де в рідній земли спочывают нашы діды.

Ґрупа молодых і заанґажуваных волонтерів не стримує своіх старань, жебы ратувати памятковы лемківскы цмонтері. Уж неодолга зачне ся дальшый робочый табір Каменярів Кычеры, цілю котрого буде завершыти працы на цмонтери в Лабовій і зачати каменярскы варштаты в Чырній.

Орґанізаторы – як і за попереднім разом – заохочуют вшыткых, для якых важна памят на лемківску спадковину – долучыти ся до табору, котрый тым разом одбуде ся в днях од 5. до 10. вересня/септембра.

Лабова, пак Чырна

В тогорічній едициі каменярскых варшатів працы будут проходити на теметові в Лабовій, але окрем того першыраз діяня будут розшырены о стары лемківскы памятникы на цмонтери в Чырній. Влони, на осін в Лабовій одбыл ся уж третій етап варштатів, завдякы котрым повело ся вратувати нагробны памятникы нашых предків перед цілковитом загыбелю.

Тогорічный пятдньовый табір буде поділеный на дві части. Найперше будут продолжаны зачаты роботы в Лабовій, а пак волентеры перенесут ся на чырняньскій цмонтір, на якым од років стары лемківскы памятникы ждут скорой реставрациі.

Тоты, якы хочут сперти акцию через веце як єден ден, прошены сут о контакт через фейсбуковый сайт Каменяре Кычеры або высланя зголошыня на майльовый адрес remontlabowa@gmail.com. Орґанізаторы забезпечают нічліг і ідло.

В попередніх робочых таборах в Лабовій брали участ особы з ріжных части Польщы. Были місцевы Лемкы, але тіж потомны выселеных Лемків, што днес прожывают на чужыні. Свою волонтерску поміч несли тіж місцевы сусіды – Полякы. Прото кажда поміч ся придаст і за кажду таку роботу орґанізаторы будут дуже вдячны. Орґанізаторы табору просят горячо каждого, хто лем має дяку дакус своіх сил і здібности внести в ратунок камінным памятникам.

Серця для каміня

Свою діяльніст ґрупа волонетрів Каменяре Кычеры веде уж од парох років. Вшытко зачало ся од того, жебы сохранити перед ліквідацийом єдно з найбільшых нашых місц памяти на рідній земли – цмонтір в Лабовій, якому не было передвиджене дальше істнувати. І як раз з той причыны колектив волонтерів при спертю ЛАПіТ «Кычера», Стоваришыня Маґурич, Стоваришыня Лемків і Музею Лемківской Культуры в Зындрановій провюл першы ревітализацийны таборы в Лабовій і збірку жертв на ратуваня тамтышніх памятників.

Каждый цінный лемківскій памятник єст не лем ревітализуваный, але і забезпечаный перед дальшым нищыньом в будучых роках. Окрем того ведена єст діґітализация крестів, так жебы было знатя, што на даный момент на лабівскым цмонтери (і неодолга на другых) находят ся такы а такы лемківскы памятникы.

Заанґажуваны каменяре на всякы можливы способы старают ся зберати потрібны грошы на продолжаня своіх діянь. Окрем орґанізуваня інтернетовых збірок берут і участ м.ін. в лемківскых пленеровых подіях, де выставляют свій крам, в котрым мож придбати як цеголку лемківскы книжкы, часописы і платні.

Так было і вчас тогорічной Лемківской Ватры на Чужыні в Михалові, де волонтеры інформували заінтересуваных веденыма діянями. Як подали пак на своім вебсайті, вельо з ватрянів высловлювало слова спертя і подякы за дотеперішнє діло, а в тым предовшыткым потомны тых, што спочывают на лабівскым теметові. Тото будує і дає силу і мотивацию до дальшых таборів.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)