1. 9. 2023: Отець Роберт Піпта призначеный за нового єпарху в Пармі

Папа римскый Франціск призначів отця Роберта Піпту за нового єпарху Пармской єпархії, котра належыть під Піттсбурґску митрполію. Новый владыка є священиком Візантійской русиньской єпархії у Фініксі а моментално є ректором Візантійской католицькой семінарії святых Кіріла і

Мефодія в Пітссбурґу.

Призначіня публіковав у Вашінґтонї 31-го авґуста 2023-го року урядом Апостольской нуніціатуры в Споєных штатах Америкы. Інформує о тім портал Конференції католицькых єпіскопів Споєных штатів.

Біоґрафія нового владыкы

Отець Роберт Марк Піпта народив ся 7-го апріля 1967-го року в Анагеімі, штат Каліфорнія. Бакаларьскы штудії музикы в роках 1985 аж 1990 абсолвовав на Каліфорньскій універзітї в Ірвінї. Пак вступив до Візантійской католицькой семінарії святых Кіріла і Мефодія в Піттсбурґу, котру закінчів у 1994-ім роцї. На священика быв рукоположеный в тім самім роцї і став священиком Єпархії Ван Нуіс (днесь Фінікс).

Новопризначеный єпіскоп служыв як вікарій у Катедралнім соборі святого Штефана у Фініксї, быв адміністратором Парохії святого Штефана в Лас Веґас, духовным Парохії Святых Ангелів у Сан Діеґо, а од 2014-го року служыв ректором Візантійской католицькой семінарії святых Кіріла і Мефодія в Пітссбурґу, котра служыть про вшыткы єпархії митрополії. Єдночасно там учів і літурґічный спів.

Отець Піпта мав у єпархії множество функцій. Мож спомянути, же є дотеперь членом Меджієпархіалной і Єпархіалной комісії про музику і літурґію, быв єпархіалным нотаріусом, членом порадного орґану Візантійской католицькой семінарії святых Кіріла і Мефодія, членом Єпархіалной колеґії конзулторів і далшых. В минулости быв і директором єпархіалного молодежного табора.

Єпархія мала лем адміністратора

Єпархія в Пармі мала од януара 2023-го року лем апостольского адміністратора. 23-го януара Папа римскый Франціск выменовав владыку Мілана Лаха, довтогдышнього єпарху в Пармі, за помічного єпіскопа Братїславской єпархії.

Апостольскым адміністратором sede vacante Пармской єпархії став по выменованю владыкы  Лаха за помічного братїславского єпіскопа владыка Курт Бурнетт, єпарха Пассаіку. Тот так само як апостольскый адміністратор моментално старать ся і о Єпархію Фінікс а Екзархат святых Кіріла і Мефодія в Торонтї.

Петро МЕДВІДЬ, ЛЕМ.фм, языкова і ґрафічна управа: АРК в СР