10. 11. 2022: Буковскый апелує на новы самосправы творити комісії на охрану меншын
В селах, містах і краях, в котрых творять членове народностной меншыны значне проценто в популації, бы могла самосправа створити в рамках своїх порадных орґанів і комісію на охрану прав меншын, пропонує Ласло Буковскый.
Інформацію приносить офіціалный сайт Уряду уповномоченого влады Словацькой републікы про народностны меншыны.
На основі резултатів остатнїх волеб почас слїдуючіх тыжднїв будуть поступно креовати ся новы орґаны міст, сел і высшых теріторіалных цїлків. На Словакії є коло 800 сел а міст, і 6 жуп, в котрых членове народностных меншын мають домінантну або значну позіцію.
Векшына тых селі і міст находить ся в Братїславскім, Тырнавскім, Нїтряньскім, Баньскобыстріцькім, Кошіцькім і Пряшівскім самосправнім краю. Як пише сайт уповномоченого, охрана прав народностных меншын, як і захованя а розвиток їх ідентічности, мають быти ґарантованы на вшыткых уровнях публічной справы, в селах, містах і жупах.
Уповномоченый влады Словацькой републікы про народностны меншыны Ласло Буковскый звертать увагу нововыбратых представителів містных і реґіоналных самосправ на то, же в смыслї платной леґіслатівы єствує можливость подля потребы зрядити різны комісії як порадны, ініціатівны і контролны орґаны сельского або містьского, і жупного заступительства.
Іде наприклад о комісії, котры будуть коордіновати роботу самосправы з потребами членів народностных меншын.
Уповномоченый апелує передовшыткым на тоты сельскы, містьскы і жупны самосправы, на котрых теріторії суть членове народностных меншын в значній кількости або там мають історічне заступлїня, жебы зрядили комісії на охрану прав меншын.
„Поважую за потребне, жебы демократічно выбераны орґаны самосправ дали позітівный сіґнал, же їм не є неінтересный вопрос підпоры і розвитку ідентічности своїх меншыновых жытелїв. Пропоную зрядити комісії, котры бы помагали в области меншынового школства, културы і при аплікації языковых прав меншын на містній і реґіоналній уровни,“ цітує сайт уряду уповномоченого Буковского.
„Комісії бы ся мали высловлёвати і давати позіції ку пропозіціям обще обовязуючіх наряджінь села, міста і жупы, як і ку приписам нелеґіслатівного характеру, котры можуть мати досяг на охрану або дотримованя прав народностных меншын, приймати становиска і пропоновати крокы з цїлём розвитку ідентічности членів народностных меншын на містній і реґіоналній уровни,“ продовжує уповномоченый.
Буковсыкй спринимать шыршу партіціпацію представителїв меншын при рїшіню дїл, котры ся їх дотуляють, і за наповнїня їх конштітучных прав. „Думам, же за остатнїй період Словакія стала одкрытїшов і толерантнїшов, што до потреб меншын, і зато вірю, же тота моя пропозіція буде мати потребну одозву,“ закінчів Буковскый.
Петро МЕДВІДЬ, ЛЕМ.фм. Ґрафічна і языкова коректура: АРК в СР.
