10. 11. 2022: До Полонин іде на проєкты скоро 8,7 міліона евр. Буде і русиньскый музей

З Плану обновы выбудують ся павілоны на позорованя, музей і оддыхова зона.

В Народнім парку Полонины зреалізує ся тринадцять атрактівных розвитковых проєктів мягкого турізму, з того три під орґанізаціями Пряшівского самосправного краю (ПСК).

Забезпечать нову техніку про полониньскы біціґльовы стежкы, розшырять астрономічну обсерваторію о новы павілоны а Полонины здіґіталізують. В Полонинах так само выникне новый музей, енвіроменталный центер, ожывлять ся там ремесла і сохранять лукы.

Проєкты здобыли підпору з резорту жывотного оточіня і фінанцованы будуть з Плану обновы і одолности Словацькой републікы. Їх цїлкова алокація є скоро 8,7 міліона евр. Інформовало о тім Оддїлїня комунікації і пропаґації ПСК.

Проєкты трёх крайскых орґанізацій

Фінанції з Плану обновы і одолсности Словацькой републікы в сумі 8,69 міліона евр уможнять в Народнім парку Полонины реалізацію тринадцятёх проєктів. У вызві Міністерства жывотного оточіня СР были успішны проєкты веце сел, Справы Народного парку Полонины, безпрофітовых орґанізацій і обчаньскых здружінь.

Але так само были успішны три орґанізації пряшівской крайской самосправы. Свій проєкт заміряный на розвиток мягкого турізму і захованя културных цїнностей країны в Полонинах зреалізують Вігорлатьске обсерваторіум в Гуменнім, Справа і утримованя драг Пряшівского самосправного краю і Іноваційный партнерьскый центер Пряшів.

Музей ремесел і русиньской културы

„Мы барз рады, же наш замір поздвигнути унікатный народный парк підпорив і резорт жывотного оточіня а схвалив Полонинам вызначну фінанчну поміч з плану обновы,“ повів председа ПСК Мілан Маєрьскый.

„Вдяка тому ся ту выбудує наприклад музей ремесел і русиньской културы, ожывить ся гончарьска майстерня, зреконштруює теренна станіця, вытворить турістічна оддыхова зона і енвіроменталный центер,“ продовжовав Маєрьскый.

Пряшівского жупана окремо тїшыть, же успішны были і проєкты орґанізацій ПСК. „Вігорлатьска обсерваторія змодернізує інфраштруктуру обсерваторії на Колоніцькім сідлї, де выникнуть два новы павілоны на позорованя, Справа і утримованя драг ПСК забезпечіть про полониньскы ціклостежкы потребну техніку а Іноваційный партнерьскый центер Пряшів дасть Полонинам і діґіталну подобу.“

Подля Маєрьского є важным головно то, же вшыткы тоты проєкты єдночасно принесуть робочі місця в секторі мягкого турізму.

Підпорены розмаїты проєкты

Вігорлатьска обсерватолрія в Гуменнім буде вдяка схваленым фінанціям реалізовати проєкт під назвов Через Полонины ку звіздам. Вытворять ся новы і якостно злїпшать ієствуючі продукты природного турізму Астрономічной обсерваторії на Колоніцькім сідлї. Збудує ся павілон про візуалне позорованя, котрый буде аж про 30 особ. Купить ся і нова техніка про обсерваторію.

Справа і утримованя драг ПСК накупить нову техніку про біціґлёвы стежкы в Полонинах. Служыти буде на їх лїтнє утримованя, забезпечіня порядку в околіцї, і комплексну старостливость о тамтешнї ціклотрасы.

Полонины будуть еколоґічны і діґіталны вдяка проєкту, котрый быв схваленый Іноваційному центру Пряшів. Полонины в рамках того проєкту чекать будованя діґіталных служеб і продуктів турістічного руху. Хранены теріторії спроппаґують ся без будьякого фізічного засягованя, і онлайн обсяг буде хосноватлів кликати до eco-friendly приступу.

Реалізовати ся буде і проєкт Новоселіцї заміряный на енвіроменталну выхову в тім селї. Выникне там енвіроменталный центер і в Народнім парку Полонины ожывлять ремесла а зрядить ся гончарьска майстерня. Коло Біґовского потока прибуде оддыхова зона, в Збої традічна мазанка, в Стащінї Музей русиньской културы.

Петро МЕДВІДЬ, ЛЕМ.фм. Ґрафічна і языкова коректура: АРК в СР.