10. 12. 2021: Елена ХОМОВА-ГРІНЁВА: Рукы, Стружляк зо соломы, Насїня (Стихы)

Елена Хомова-Грінёва

Рукы

На твоїх руках

видно мозолї

з роботы

зробленов вчас.

Кропаї поту з чела

з нима повтераш

через день нераз.

Ці грїє сонце,

ці додж падать,

рукы не одпочівають

тяжко і довго

на хлїб насущный

зарабляють.

 

 

Стружляк зо соломы

В стодолї до стружляка

напхам новой соломы,

однесу на хырбетї

на постіль порожню.

Як мороз пофарбить

набіло облачкы,

пахотов поля

і теплом перины з піря

прикрыю ся

перед спанём дома.

 

 

Насїня

Дозрїте насїня

позберам з поля

в осени на обід,

як малу дїтину

до плахтонкы завию,

няй одпочине на подї,

сухе почекать до яри.

Потім ёго по чорній земли

як вітор нараз розсїю.

Покроплене небеснов росов

двигне догоры головку

за сонечком в маю.

 

(З приправлёваной книжкы – Під скалов росте свербогуза.)