10. 2. 2021: Вышли приручникы ку вжываню меншыновых языків

Не вжывайте ваш язык лем дома: Возьмийте Харту за слово і выхоснуйте вшыткы можности ёго вжываня і мімо вашых обысть – позывать ку вжываню меншыновых языків уповномоченый влады Словацькой републікы про народностны меншыны і етнічны ґрупы Ласло Буковскый.

Як в середу, 9-го фебруара 2022-го року, Буковскый інформовав, же Уряд уповномоченого у сполупраці із секретаріятом Европской харты реґіоналных або меншыновых языків Рады Европы в Штрасбурґу приготовив приручникы о языковых правах про жытелїв Словакії, котры бісїдують по мадярьскы, ромскы, русиньскы і україньскы.

„То добра новина про членів найвекшых народностных комуніт на Словакії,“ говорить уповномоченый про народностны меншыны Буковскый о публікації, котра на основі европского документу вказує на можливости і інштрументы, як охранёвати і розвивати історічны реґіоналны або меншыновы языкы.

Буковскый вірить, же популарізачны приручникы принесуть на сторонї вжывателїв меншыновых языків і орґанів верейной справы очекованы ефекты.

Европска харта реґіоналных або меншыновых языків є договор приятый дакотрыма країнами Рады Европы на охорону історічных реґіоналных або меншыновых языків Европы.

Словацька републіка підписала Харту у 2001-ім роцї і оголошіня Міністерства загранічных дїл Словацькой републікы было пак публіковане в Збірцї законів. Харта має подля Уставы Словацькой републікы пріоріту перед словацькыма законами.

Русиньскый приручник можете найти за тым мотузком aбо на тій адресї : https://rm.coe.int/language-guide-ruthenian-in-slovakia/1680a571eb?fbclid=IwAR02NRl93HwLPsV_yOCusad3RkkTFnId09XzkZqcRVQ_dIQ_5ioP3w58kWI

Петро МЕДВІДЬ, Лем.фм. Ґрафічна і языкова управа: ред. АРК в СР.