10. 2. 2022: Меджілабірцї хотять обновити влакы на Україну

Підпорити розвиток турізму в пригранічнім словацько-польско-україньскім реґіонї бы представителї містных самосправ хотїли і посередництвом обновлїня влаків на штрецї першой угорьско-галічской желїзніцї.

Меморандум о сполупраці за словацьку сторону кінцём першого фебруарового тыждня 2022-го року підписав пріматор міста Меджілабірці Владислав Вышнёвскый. Інформовала о тім аґентура TASR.

Ку обновлїню желїзнічного споїня меджі Польщов і Українов ся міністры обидвох держав завязали до кінця того року. Як повів Вышнёвскый, Україна ся посередництвом сового міністра завязала заінвестовати до своёй части штрекы і дати єй до кінця року до ходу. Обновлена штрека буде на трасї од польского міста Устрикы Нижнї через україньску Смилньницю, Хирів, Нижняковіцї до Перемышля.

Словацька сторона чекать на злїпшіня пандемічной і ґеоплітічной сітуації. Споїня із Словакіёв буде через Лупківскый тунел до Меджілаборець. На стрїчі представителїв пригранічных самосправ і меншых теріторіалных цїлків ся мали сіґнатарї доїднати на тім, же буде дана до ходу цїла штрека од Меджілаборець до Львова.

Подля слов Вышнёвского місто Меджілабірцї хоче быти до того закомпоноване і од обновлїня влаків очекує головно розшырїня можностей про турістічный рух.

„О тім замірї мы вже з полськов сторонов діскутовали, но актуално о даній темі не їднаме з причіны коронавірусу і напруженой сітуації меджі Росіёв і Українов,“ повіла про аґентуру Міріяма Швікругова з оддїлїня комунікації Міністерства транспорту і будованя Словацькой републікы з тым, же по „выяснїню сітуації“ є резорт приготовленый вєдно глядати рїшіня на запроваджіня такых влаків.

Петро МЕДВІДЬ, Лем.фм. Ґрафічна і языкова управа: ред. АРК в СР.