10. 2. 2024: Цісарёва атака

До кого будуть хотїти ся приєднати по далшій змінї?

Од 1-го септембра минувшого року, коли є початок церьковного року, Україньска ґрекокатолицька церьков і Православна церьков Україны ідуть за такзваным новоюліаньскым календарём. Мукачовска ґрекокатолицька єпархія, русиньска церьков свого права, вырїшыла прияти ґриґоріяньскый календарь.

Як час вказує, календарьна реформа, котру прияла Мукачовска єпархія, стала лем далшым інштрументом україньской церьковной політікы, жебы єй атаковати, а найлїпше зничіти єй окреме єствованя.

Не малу роль в тім знова хоче грати і портал Закарпаття оналйн, котрый веде Олег Диба, Русинам доста познатый україньскый шовініста і антірусиньскый пропаґандіста. Якраз тот портал вже не раз принїс „сензації“ односно русиньского руху, котры го мали діскредітовати, а не раз вже на тім порталї были і статї, котры крітіковали Мукачовску єпархію, яка за думками авторів тых статей так само є „сепаратістічнов“.

Но і хто бы не схосновав сітуацію, коли не вшыткы спокійны суть з календарьнов реформов, гейже?

Што до особного погляду на календарьну реформу, єствують два календарї Юліаньскый, котрый нам є історічно близкый, але не є точный у „рахованю часу“, зато все по якымсь часї мусить придати ся далшый день роздїлу, а пак ґриґоріяньскый, котрый є точный, но і в русиньскых середовисках, де вже давно календарьна реформа перешла, бере ся як штось, што не є наше. Але реално суть лем дві можности. Іти за новым або іти за старым календарём.

І зато, кедь уж має прийти до даякой реформы календаря, пак то якраз Мукачовска єпархія зробила правилно. Покля не хочеме Пасху по новому, пак бы не мало быти ани Рождество по новому. Не дасть ся жыти так, же часть драгы ідеме як в Европі, а часть як у Великобрітанії, бо на драгах буде хаос.

Такзваный новоюліаньскый календарь, кедь правду казати, є компроміс, котрый практічно не фунґує, а ёго нефункчность вказує ся наприклад і в тім, же можуть выйти рокы, коли ани не є піст перед праздником святых апостолів Петра і Павла, але тото уж якось доґматікам, котры не припустять „католицьку“ Пасху, не перешкаджать.

Но вернийме ся до темы. То, же Мукачовска єпархія вырїшыла перейти на ґриґоріяньскый календарь, уж веце раз было темов ґлосованя наймудрїшых в тім дїлї. Наприклад мав о тім статю Олександр Гаврош на порталї україньского Радіо Свобода, а простор на тоту тему дає і портал Закарпаття онлайн.