10. 4. 2018: Анна Плїшкова была оцїнена Бронзовов медайлов Пряшівской універзіты

10. апріля 2018 од 13.00 год. в просторах Штудентьской їдалнї Пряшівской універзіты (ПУ) в Пряшові (Словакія) з нагоды Дня учітелїв одбыла ся святочна громада Академічной общіны Пряшівской універзіты.

 

Окрем іншого, ту оцїнёвали заслуженых учітелїв споминаной універзіты. Меджі оцїненыма была і доц. ПгДр. Анна Плїшкова, ПгД., а то Бронзовов медайлов Пряшівской універзіты у Пряшові. Але А. Плїшкова в тім часї не могла собі особно перевзяти оцїнїня з рук ректора Пряшівскй універзіты Др. г. к. проф. ПгДр. Петра Конї, ПгД., бо в тот день чітала реферат Русиньскый язык 1992 – 2015 : Досягнуты выслїдкы і новы задачі у Славяньскім інштітутї Академії наук Чеськой републікы.

 

А. Плїшкова была оцїнена главно за 20-річну роботу на челї спершу Оддїлїня русиньского языка і културы Інштітуту реґіоналных і народностных штудій ПУ, потім самостатного Інштітуту русиньского языка і културы ПУ а теперь і Цетра языків і култур народностных меншын Пряшівской універзіты у Пряшові.