10. 5. 2023: ПСК добудує далшу ціклостежку меджі русиньскыма селами в Полонинах

В Полонинах добудує ся далша біціґлёва стежка. Іде о веце як штири кілометрів довгу трасу од села Влыч по село Кривый.

Як інформовало Оддїлїня комунікації Пряшівского самосправного краю (ПСК), край підписав контракт на фінанчну дотацію з Міністерсвом інвестіцій, реґіоналного розвитку і інформатізації Словацькой републікы, котре проєкт зафінанцує.

Проєкт є в сумі 1,64 міліона евр. Споминана траса є єднов з трёх, котры Пряшівскый самосправный край добудує іщі в тім роцї. Траса ціклостежкы Влыч – Кривый є далшов етапов ціклоокругу Poloniny Trail. Край сполуфінанцує проєкт пятёма процентами.

Через облюблены дестінації

„Я радый, же і наперек комплікаціям почас послїднїх трёх років приправ доказали сьме сповнити вшыткы условія поданя проєкту і контракт, котрый проєкт зафінанцує, маєме підписаный,“ повів председа ПСК Мілан Маєрьскый.

За словами пряшівского жупана актуално буде проходити процес контролї публічного обстараваня на зготовителя ставбы на резортї інвестіцій, пак здобуде контракт платность. Наслїдно може будованя од Влыча по село Кривый зачати.

Траса меджі Влычом і Кривым веде з містной комунікації по лївім берегу Збойского потока, наслїдно ся перейде через деревяну лавку на правый берег, і продовжує трасов бывшой лїсной узкоколяйной штрекы.

Напланована є коло Збойского потока до села Влыч. Піде коло турістічно облюбленых дестінацій, через водну перегороду на ріцї Улічка, і цїлкова довжка є понад штири кілометры.

В планї і далшы трасы

ПСК приготовлює до реалізації і далшы части Poloniny Trail. Конкретно меджі Рунинов і Кривым, так само меджі Влычом і Калнов Розтоков, як і перекапчаня трас на Стащіньску Розтоку. Тыма трасами ся цїлый ціклоокруг, котрый буде мати по докінчіню 86 кілометрів, запре.

„Округ Poloniny Trail, котрый капчать села народного парку і ёго унікатны місця, але і деревяны церькви а тутешню природу, наберать реалны контуры і мене тїшыть, же уж дораз через першы докінчены проєкты ціклотрас даме турістам, котры ту завітають, обіцяный нелем шпортовый, но і природный а културный зажыток,“ доповный Маєрьскый.

Атрактівный проєкт ПСК Poloniny Trail має підняти потенціал Полонин і помочі ку розвитку турізму в тій части краю. Ідея будованя біціґлёвой інфраштруктуры вышла з выступів ініціатівы Catching-up Regions, котру ПСК імплементує од 2018-го року. Вдяка тій ініціатіві в окресї Снина проінвестує ся до кінця того року понад 15 міліонів евр.

Позначка: Села Влыч і Кривый в статї записаны суть подля нового списку народностных сел і міст, котрый є платный од 1-го марца 2023-го року. Зміна з Уліч на Влыч а Уліч-Кривый на Кривый настала по конзултації з містныма жытелями, жебы їх села записовали ся офіціално так, як їх самы называють.

Петро МЕДВІДЬ, ЛЕМ.фм, языкова і ґрафічна управа: АРК в СР.