10. 8. 2022: Проблемы з водов голосить уж і Воліця. Сітуація є барз плана
Недостаток доджу, котрый запричінює знижіня выдатности водных джерел про сельскый водовов, обмеджує жытелям русиньского села Воліця, Меджілабірьского окресу, звычайны потребы.
„Не годны суть райбати, варити, заваряти, мыти ся, допестовати властны продукты, без воды просто не мож жыти,“ повіла про аґентуру TASR старостка Воліці Моніка Рогалёва. Покля така сітуація буде і в далшых роках, село буде мусити глядати далшы водны джерела.
Проблем з водов повторять ся, сітуація є плана
Як пояснила старостка, сельскый водовод збудовали жытелї Воліцї самопомічно в роках 1965 аж 1967. У 2017-ім роцї обновили вдяка дотації од Енвіроменталного фонду водны жрідла, влони з єднакого фонду реалізовали першу етапу обновы водоводных рул на трасї коло главной драгы, де жытелї не мають достаток воды.
Подля Рогалёвой треба іщі обновити трасу водоводу в центрї села. Село подавать жадость на енвірофонд о дотацію каждый рік.
„Покля буде така кліматічна сітуація тырвати, треба глядати далшы жрідла воды в околіцї села, жебы і в лїітнїм періодї быв достаток воды. Властны фінанції села на такы інвестіції не старчать, без дотацій їх село не може реалізовати,“ доповнила.
Проблем з недостатком воды в сельскім водоводї подля слов старосткы повторять ся в лїтї в сухім періодї шторочно, но тот рік є то „барз плане“.
Жытелї ходять по воду на уряд
Село забезпечує довоз воды до сельского водоєму од Выходословацькой водарьской компанії. „Такый довоз воды про село є фінанчно дорогый, веце заплатиме за транспорт як за воду,“ підкреслила Рогалёва з тым, же ани тото рїшіня не старчіть цалком.
Жытелї, котрым нияк вода не тече, собі по ню можуть ходити на сельскый уряд, многы собі взаємно помагають. Мало воды чують Волічане і в студнях.
„Цїлый час вызываме жытелїв, жебы шпоровали воду, не хосновали воду із сельского водоводу на поливаня загороды, публічного пространства, мытя авт, напущаня базенів і озер в загородах а на ставебны цїлї,“ закончіла старостка.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
