11. 1. 2023: Церков в Розтоці з новым ґонтом

Бывша грекокатолицка церков покровы св. Димитрия в Розтоці Великій переходит малый ремонт. Выміняный єст ґонт на обєкті. Ремонт повело ся зробити завдякы фінансуваню од Державных Лісів.

Церков св. Димитрия вознесена была в 1819 році през лемківску громаду. Од 1947 рока хоснувана є як римокатолицкій костел Пресвятого Серця Ісуса Христа – дочырній костел парохіі Матери Божой Ангельской в Новій Веси. Церков в Розтоці была ремонтувана в 1881 і в 1938 році. Храм вписали до реґістру державных памятників в 1964 році.

Новый блеск деревяных ґонтів

Стан деревяного ґонту на храмі был уж на тілько злый, што місцевый парох о. Войцєх Охалік рішыл поглядати дофінансуваня на його цілковиту выміну. Повело ся завдякы дофінансуваню з проєкту «Дерево єст з ліса» Державных Лісів. Дотация высокости 100 тис. зл дозволила покрыти половину коштів выміны деревяных ґонтів, другє піл забезпечыла парохія зо своіх середків. Роботы рушыли кінцьом листопада/новембра 2022 рока і помалы ся завершают.

Бывша грекокатолицка святыня має типову для лемківксых церкви зрубову конструкцию. Над олтарьом возносит ся шмытка вежа з малюваным синьо-помаранчевым навершником вежы з дзвоном з 1695 рока. Храм вірных і олтар накрывают шатровы, переходячы в двоспадисты дахы з бляхы. Вшыткы дахы звінчены сут цибулястыма голмами з псевдолітарнями і желізныма крестами. В середині находит ся м.ін. некомплетный іконостас, котрый походит з 1881 рока, як тіж головный престіл зо сучасным образом Пресвятого Серця Ісуса Христа.

Ремонтуют тіж в інчый части Лемковины

В посліднім часі довели до кінця ремонт лемківской капличкы в селі Бодакы. Консерваторскы роботы тырвали од половины вересня/септембра до кінця листопада/новембра минулого рока.

Давный блеск капличці привернула выміна характерного для ней даху і выконаня нового тинку на зовни обєкту, якій был побудуваный коло 1900 рока. Выремонтували стріху – вымінили покрытя з ґонту, де был стриманый процес нищыня і деґрадациі капличкы. Цілковитый кошт ремонту то 21,5 тис. зл, з чого 12 тис. покрыло Малопольскє Воєвідство, а 9,5 тис. зл Ґміна Санкова.

Наталія МАЛЕЦКА-НОВАК, ЛЕМ.фм.

(Публікуєме в оріґіналї – лемківскім варіантї русиньского языка.)