11. 11. 2022: Помідоровом поливком B ван Ґоґа, а тепер фарбом в «Поливкы Campbell’s» Варголя! Активісты зас атакуют

Кльод Моне, Вінсент ван Ґоґ, Йоганес Вермер, а тепер Енді Варголь. То уж черговый атак активістів на творы штукы. Тым разом достало ся славній сериі «Поливок Campbell’s» авторства Енді Варголя.

Дві молоды дівчыны, активісткы, што протестуют проти дотациям на копальні палива, прібували приклиіти ся до сериі образів Варголя в Нацийональній Ґалериі Австралиі. Перед приклиіньом замазали образы синьом фарбом в спрею. Щестливі культовы поливкы сут за шыбом, так што іх не пошкодили.

Охорона выпровадила активісткы з музею нич клий, котрым приклиіли ся до образів, встигнул засохнути.

Ґрупа Stop Fossil Fuel Subsidies поінформувала в освідчыню, што хоче, жебы австралийскій уряд закінчыл підперати нафтовый, ґазовый і угльовый промысел. Додали, што сут частю цілосвітовой сіти руху цивільного опору знаного як А22.

Боні Касен, котра была заанґажувана в протест в Канберрі, повіла, што Варголь в культовій сериі образів представил розшалілый консумпцийонізм. «Капіталізм зошаліл. Родины мусят выберати медже ліками а ідлом для своіх діти, а в тым самым часі промысел звязаный з паливами приносит рекордовы зыскы. Наш уряд передає 22 тис. дулярів на минуту для того промыслу» – подала Касен.

До інциденту дошло по подібных протестах, вчас котрых активісты нищыли знаны творы штукы. Цілю активістів были уж образы Кльода Монета, Вінцента ван Ґоґа і Йоганеса Вермера.

Єдна з активісток прібувала приклиіти ся до образів, але выпровадили єй, нич засох клий. Поліция потвердила інтервенцию в ґалериі, але передала, што никого в тій справі не арештували.

Наталія МАЛЕЦКА-НОВАК, ЛЕМ.фм

(Публікуєме в оріґіналї – лемківскім варіантї русиньского языка.)