11. 12. 2021: Будеме робити дале

Редакция ЛЕМ.фм+ рішыла пляны на будучый рік.

Ден перед нацийональным святом Лемків – Дньом Русинів Польщы, в суботу – 4. грудня/децембра 2021 р., в просторах ґорлицкой Руской Бурсы засідала редакция медияльной ґрупы ЛЕМ.фм+.

Была то уж дальша стріча вшыткых редакторів, якы наштоден роблят про лемківскы медиі, з ріжных части Карпатской Руси і чужыны.

Добрі, же сме разом

Пришли редакторы з Лемковины, Пряшівщыны і Підкарпатской Руси. Не бракло редакторів з чужыны – західніх земель Польщы, Варшавы ци Кракова. З причыны тырваючой пандеміі дальшый раз не была присутна наша спілпрацівниця – кореспондентка з Украіны.

Засіданя одкрыл шефредактор Петро Медвідь. Повіл, што тішыт ся на стрічу, тым більше же в тых нелегкых обставинах повело ся такой вшыткым зыйти. Представил проґрам засіданя і оддал голос дальшым редакторам, якы рішали вшелеякого рода справы односячы ся до іхніх обшыри редакцийой роботы.

Редакция першый раз такой цілым складом станула під пропамятном таблицьом, одкрытом 9. вересня/септембра 2021 р. То таблиця з іменом Богдана Ґамбаля, думкодавці і основателя нашого радия та до смерти шефредактора русиньскых медий в Польщы – ЛЕМ.фм+, якым названо історичну будівлю Руской Бурсы в Ґорлицях.

Што было, а што перед нами

Присутны рішыли головны проблемы, якы явили ся вчас тырваючого рока. Єдным з важнійшых пунктів засіданя было порішыти проґрам высыланя в будучым році, догварити, ци і котры з авдиций будут продолжаны, а тіж запропонувати новы. Єдным з плянів єст рыхтувати каждый ден новины зо світа, окрем реализуваных од років новин з Лемковины і земель, на якых жыє наш нарід. Дакотры з проґрамів нажыво будут мати выдолженый час штоденного высыланя.

Бесіда односила ся і до фінансуваня діяльности лемківскых медий в 2022 р. Актуально ждеме на рішыня Міністра Внутрішніх Справ і Адміністрациі в справі підпоры діяльности радия і інформацийного порталю www.lem.fm. Стараме ся і о дальшы джерела фінансуваня, якы дозволят не лем продолжати тото, што уж повело ся осягнути, але і постепенно розвивати ріжны обшыри медияльной дільности.

Наконец каждый придал свій голос до радийового мікрофону, з чого пак будут намонтуваны новы радийовы джінґлі. Як все – редакторы пошколили ся і з технікы і обслугы нарядя потрібного до штоденной роботы. Якы вызваня принесе будучый рік? Дознаме ся уж такой о хвилю.

Севериян КОСОВСКЫЙ, ЛЕМ.фм+

(Публікуєме в оріґіналї – лемківскім варіантї русиньского языка.)