11. 12. 2023: Пряшівскый край дасть на дотації 4 міліоны евр. Господарити буде із 275 міліонами

Далшых 150 тісяч евр піде на поміч по землетрясїню.

З розрахунком понад 275 міліонів евр буде у 2024-ім роцї господарити Пряшівскый самосправный край (ПСК). В порївнаню з тым роком є то о 14 міліонів веце.

В понедїлёк, 11-го децембра 2023-го року, о тім вырїшыли посланцї Заступительства ПСК на своїм послїднїм тогорочнім засїданю. Подля ведучого Оддїлїня фінанцій Уряду ПСК Петра Макары было складным поскладати розрахунок.

„Меджірічно нам ішли горї мзды, вытраты на ход повязаны з енерґіями, але і зо звычайным утримованём, зато было складным поскладати звычайный розрахунок,“ повів і доповнив, же не хотїли моментално робити прінціпіалны крокы, котры бы значіли пропущіня людей з роботы або запераня дакотрых орґанізацій, котрых є ПСК зряджователём.

Выдїлили і грошы на дотації

Як інформовала Леа Леготьска з Оддїлїня комунікації ПСК, і у 2024-ім роцї крайска самосправа підпорить добры проєкты в реґіонах. Цїлково ся на дотації выдїлили 4 міліоны евр, і заінтересованы будуть годны жадати о фінанчну підпору од 2-го януара 2024-го року, о чім так само вырїшыли посланцї на децембровім засїданю.

Найвысшу суму – два міліоны евр, посланцї схвалили у Вызві про реґіон. Села, міста, обчаньскы здружіня, безпрофітовы орґанізації, реґістрованы церькви, юрідічны ці фізічны особы з Пряшівского краю будуть годны жадати край о дотацію на свої проєкты в штирё проґрамах.

Конкретно іде о ціклотранспорт, турістічный рух і путницькый турізм, културу а шпорт, і соціалны службы. Мінімална дотація в тій вызві є 15 тісяч, максімална 200 тісяч евр.

У Вызві посланцїв ПСК є алокованых 1,43 міліона евр, і у Вызві председы ПСК 440-тісяч евр. В обидвох дотачных проґрамах можуть заінтересованы жадати мінімално 500 евр а максімално 5000 евр, і то в проґрамах шпорт, култура, соціалны службы, родинна самосправа, підпора жывотного оточіня і підппора служеб у здравотництві.

Термін на передкладаня жадостей у вшыткых трёх споминаных вызвах є до 19-го фебруара 2024-го року.

Партіціпатівный розрахунок

Посланцї ПСК схвалили і 130 тісяч евр на Вызву Партіціпатівный розрахунок, котра є заміряна на реалізацію общехосенных проєктів і общехосенных служеб з цїлём залучіти до вырїшованя о вітязных замірях жытелїв краю.

Край притім підпорить проєкты і ініціатівы в области іновації існуючой або створїня новой публічной службы у публічнім просторї. Так само дає шансу проєктам в области ревіталізації публічных просторів або тым, котры хотять будовати комунітну інфраштруктуру в публічнім просторї.

До вызвы можуть залучіти ся обчаньскы здружіня, безпрофітовы орґанізації, Словацька рада родічовскых здружінь, реґістрованы церькви і реліґійны общіны, котры мають свій центер на теріторії Пряшівского краю, або в нїм дїють.

Сума дотації на єдну жадость є 10 тісяч евр, і заінтересованы будуть годны подавати в тій вызві жадости до 19-го фебруара.

Далша поміч по землетрясїню

На засїданю Заступительства ПСК была схвалена і далша поміч про теріторії, котры постигло октоброве землетрясїня. Вдяка корекції розрахунку і цїленій дотації схваленій крайскыма посланцями посередництвом Фундації Пряшівского самосправного краю про підпору родины буде мочі роздїлити ся далшых 150 тісяч евр.

Фінанції поможуть нелем фізічным особам, але і селам а парохіям, котры потерпіли шкоды по тій природній катастрофі. Дотація 150 тісяч евр є выключно із джерел ПСК.

Точный механізм перероздїлїня сваленой дотації буде предметом засїданя Справной рады фундації. ПСК і ёго фундація в справі підпоры доткнутых фізічных і юрідічных особ притім рахує і з далшыма формами помочі. Іде о авізовану поміч з боку словацькой влады, спонзорьскы дары і дары од людей, але і о поміч з бізнісовой сферы.

Петро Медвідь, lem.fm