11. 4. 2024: На словацькім і польскім боцї обновлять далшы турістічно експонованы драгы

Пряшівскый самосправный край (ПСК) зреалізує далшы вызначны проєкты на драгах вдяка черезгранічній сполупраці Interreg. Новый асфалт буде спаяти приграніча Выходных Карпат, Вышнїй Шаріш з Мушынов, як і приграніча через Дуклю.

Ренововати ся так само буде далша часть в Пєниньскых народных парках, конкретно в селї Камюнка. Цїлково перейде реноваціёв в ПСК коло 10 км драг за майже 7,2 міліонів евр. Інформовала о тім Леа Леготьска з Одділіня комунікації Канцеларії председы ПСК.

Комітет моніторованя Проґраму черегранічной сполупраці Interreg Словакія – Польща 2021 – 2027 недавно вырїшыв о схвалїню, а тым і о реалізації далшых штирёх сполочных проєктів Справы і утримованя драг Пряшівского самосправного краю і польскых партнерів. Драга буде ся робити наприклад і в Малій Полянї або перед селом Ваґринець.

„В проґрамі Interreg знова были сьме успішны і здобыли понад 7 міліонів евр, причім наша Справа і утримованя драг была успішна в штирёх із шестёх проєктів,“ повів Мілан Маєрьскый, председа ПСК.

„То доказ, же сьме досправды барз добрї приготовлены повнити заміры, котры сьме собі в повязаню з нашым крайом і ёго розвитком дали,“ доповнив пряшівскый жупан з тым, же актуално схвалены проєкты вылїпшать параметры черезгранічных споїнь, котры суть вступнов бранов до народных парків і природных локаліт. „Прямо тым злїпшыме доступность, а непрямо і навщівность веце локаліт нашых реґіонів.“

Фінанчно найвекшый черезгранічный проєкт, котрый буде ся реалізовати в Пряшівскім краю і в Підкарпатьскім воєводстві, має назву Спаяме приграніча Выходных Карпат. Ёго цїлкова сума є майже 5 міліонів евр, з того на словацькім боцї проінвестує ся 2,8 міліона евр. Змодернізує ся за них драга за селом Гавай по Малу Поляну.

ПСК і Підкаратьске воєводство будуть реалізовати і проєкт Спаяме приграніча через Дуклю в цїлковій сумі 4,6 міліона евр. В ПСК то уможнить реконштруцкію двох драг. Обнова почне перед селом Ваґринець а закінчіть ся на граніцї окресу Свідник – Стропків.

Продовжовати ся буде і в далшых драгах в Пєнинах. В штириміліоновім проєктї Модернізація драгового споїня Пєниньскых народных парків ся буде робити наприклад драга в Камюнці.

Реновованы будуть і драгы на Вышнім Шаріші в околіці Мушыны, і то вдяка проєкту ПСК з Мушынов під назвов Спаяме Вышній Шаріш з Мушынов за 3,8 міліона евр. В рамках нёго буде робити ся наприклад драга, котра іде ку гранічному переходу Чірч – Лелюхів.

Петро МЕДВІДЬ, ЛЕМ.фм, языкова і ґрафічна управа: АРК в СР.