11. 7. 2022: Посланцї в Стропкові схвалили вступ до Карпатьского реґіону

Місто Стропків хоче вступити до меджінародного здружіня Карпатьскый реґіон із центром в польскім містї Ряшів. Як інфомровала аґентура TASR, на остатнїм засїданю вступ схвалили містьскы посланцї.

Самосправа од того очекує новы черезгранічны принагоды. Місто має быти за словами говорцю міста Петра Новака прияте по вырїшіню орґанів здружіня Карпатьскый реґіон.

З пропозіціёв на вступ Стропків подля Новака ословило здружіня. В Польщі дїє уж майже тридцять років і ёго членами суть самосправы з области Підкарпатьского і Малопольского воєводства. У 2020-ім роцї ся змінив штатут здружіня, вдяка чому Карпатьскый реґіон став черезгранічнов юрідічнов особов.

Зміна штатуту в практіці значіла то, же до орґанізації можуть приєднати ся і загранічны особы а субєкты. Першыма членами здружіня із Словакії были місто Спішске Подргадя і села Земпліньскы Гамры, Малый Шаріш, але і русиньскы Словінкы на Спішу.

У фінанчній перспектіві на період років 2021 – 2027 буде Карпатьскый реґіон одповідный за справованя фонду мікропроєктів в рамках пріоріты Творче і турістічно атрактівне приграніча в рамках проґраму Interreg PLSK 2021 – 2027. Значіть, орґанізація буде і далше годна сполуфінанцовати словацько-польскы проєкты аж до сумы 80 тісяч евр у области розвитку турістікы.

Найважнїшым проєктом є подля Новака вытворіня і пропаґація карпатьской значкы Carpathia і їй сеґментів Hiking, UNESCO, Vine ці EtnoCarpathia.

„З еврореґіоном спплупрацуєме на різных уровнях вже дакілько років, зато вітаме можлиность стати ёго актівныма членами. В новім проґрамовім періодї проґраму Interreg так само видиме принагоду на здобытя далшых фінанчных средств на розвитковы проєкты,“ повів пріматор міста Ондрей Брендза.

Додав, же місто было в проґрамі Interreg 2014 – 2020 успішне з каждым поданым проєктом, причім замірявали ся на інвестічны, але і „магкы“ актінвости в рамках укрїпіня черезгранічной сполупрацї з Польщов, гласвно з Ряшовом, Крочынов, Бобовов ці Санковов.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР