12. 11. 2020: Русиньскый музей рихтує онлайн Ніч музеїв і ґалерій. Варголів музей отворили

Ніч музеїв і ґалерій, котра мала проходити 16-го мая 2020-го року, ся наконець одбуде онлайн 14-го новембра. Проґрам в інтернетовім просторї приготовлює і Словацькый народный музей – Музей русиньской културы в Пряшові.

Наперек тому, же тырвають протиепідеміолоґічны наряджіня, Музей модерного уменя Енді Варгола в Меджілабірцях оголосив, же свої просторы уж одкрывать про навщівників. Пряшівскый русиньскый музей є затля, як нас інформовала директорка Люба Кралёва, запертый до 14-го новембра. Ці вуде по тім датумі одкрытый не знала повісти, кедьже о тім рїшать Братїслава.

Русиньска Ніч музеїв і ґалерій

Як інформовав на своїм офіціалнім сайтї на сітї Facebook Словацькый народный музей – Музей русиньской културы, до проєкту Ніч музеїв і ґалерій залучіть ся відеозаписами жанорово розмаїтых подій, котры в нїм проходили.

„Представиме творчость знамого карікатурісты Федора Віца з ёго довгодобого кресленого русиньского серіалу Ілько Сова з Баюсова. Ёго актуална выставка буде в нашім музею до кінця рока. В проґрамі Джез в музею нам заграть клавіріста і композітор Павел Мороховіч. Любителїв історії бізовно заінтересує стабілна експозіція Утверди, Боже – з історії Православной церькви на Словакії до 1948-го року,“ авізує русиньскый музей.

В рамках події в онлайн высыланю музей представить і творчость русиньскых літераторів – Владислава Сивого, Осифа Кудзея, Марії Мальцовской і Даніелы Капралёвой. Споминати ся буде і на академічного маляря Михала Чабалу, а дїтям в музею прочітають і приповідкы. В рамках проґраму, котрый буде мож позерати в суботу од 15.00 год. до 20.00 год., буде мож посмотрити і выставку Владиміра Ґаная під назвов Односины. Як інформує музей, тота уж буде доступна лем дакілько днів, бо просторы, де Ґанай має свої образы, зачінають ся реконштруовати. Мотузок на суботняйшый онлайн проґрам русиньского музея можете найти на ёго сайтї на сітї Facebook.

Музей Варгола одкрытый

Музей модерного уменя Енді Варгола в Меджілабірцях по запертю з причіны протиепідеміолоґічных наряджінь є знова одкрытый од 12-го новембра. Як повів про аґентуру TASR директор музея Мартін Цубяк, капаціта максімално 40 навщівників платить і далше, єднако як вшыткы остатнї наряджіня. „В каждій експозіції нашого музея будеме дозерати на то, жебы в нїй было максімално шість особ в єднім моментї,“ доповнив. Варголів музей навщівило почас тогорічной лїтнёй сезоны понад 12 700 людей. Подля Цубяка іде о абсолутный рекорд дотеперїшнёй навщівности за 29 років єствованя. Векшый інтерес людей о музей приписує двом пропаґачным проєктам, котры вытворили почас запертя в повязаню з першов волнов пандемії на ярь.

Єдным з них є авдіовізуална серія COVID-EO project, на котрім Варголів музей сполупрацовав з Факултов умень Технічной універзіты в Кошіцях, другым є 150 сітілайтів, котры суть од Братїславы по Гуменне в рамках проєкту Підтримуєме уменя, што быв резултат сполупраці музея з орґанізаціёв Кvarho13 – Кошіцькы културны центры і платфрмов медіалного уменя MAO.

Петро МЕДВІДЬ, лем.фм, языкова управа: ред. АРК в СР.