12. 3. 2024: В Гуменнім проходить выстава Карпатьска писанка 2024

І тот рік Вігорлатьскый музей в Гуменнім у сполупраці із Окреснов орґанізаціёв Унії жен Словакії зорґанізовали вже 32-ый річник меджінародного конкурзу Карпатьска писанка 2024. Выстава із тогорічного конкурзу была одкрыта 7-го марца 2024-го року у Выставній салї Ореста Дубая.

Уж 32 років приносить конкурзна выстава Карпатьска писанка розмаїту і фаребну плеяду писанок, як інформовала Вероніка Латтова із Пресового оддїлїня Містьского уряду в Гуменнім. Тот рік мож на выставі відїти довєдна 560 писанок од 59-ох авторів, котры до конкурзу приголосили ся.

Окрашены яєчка до Карпатьской писанкы 2024 посылали нелем реґіоналны і словацькы майстрів писня крашанок, але і автoры з Мадярьска, Польщі і Україны.

„В минулости мало маґічне значіня таке яйце, котре было цїле, не мало дїры. Днесь вже іде о естітічну, респектівно окрасну функцію. Зато за традічны технікы береме такы, котры не перфоровали шкапулу, наприклад віскова батіка, вышкрябованя, дротованя або облїплёваня. До модерных належыть мадеіра або ся хоснують полістіреновы яйця при патчворку, пластіковы формы, но найдеме і медовниковы або гачкованы. Люде експеріментують і комбінують традічны і модерны технікы,“ пояснив Йозеф Фундак, етноґраф Вігорлатьского музея.

Першы крашены яєчка нашли ся уж при археолоґічных выкопавках у Еґіптї, в Перзії, пізнїше в Европі. Вігорлатьскый музей выставлює так само репліку писанкы із 15-го столїтя, котру обявили при Львові.

Тогорічну Карпатьску писанку 2024 оцїнёвала тричленна журі в складї Марош Демко, Марія Мішкова і Даґмар Унґрадіёва. Выставу буде мож у Вігорлатьскім музею відїти до 21-го апріля того року.

 

Петро МЕДВІДЬ, ЛЕМ.фм, языкова і ґрафічна управа: АРК в СР.

Фотоґрафії: humenne.sk