12. 6. 2023: Одкрыли 11-ый рочник Studium Carpato-Ruthenorum

11-го юна 2023-го року в просторах Пряшівской універзіты в Пряшові одкрыли 11-ый річник Studium Carpato-Ruthenorum – Меджінародной лїтнёй школы русиньского языка і културы.

Лїтня школа тот рік орґанізує ся першый раз од 2019-го року, кедьже попередні рокы были позначены пандеміёв і проблемами з подорожованём загранічных штудентів, котры традічно творять векшу часть заінтересованых.

Пряшівска універзіта в Пряшові, в рамках котрой їіє Інштітут русиньского языка і културы, є єдинов універзітов у світі, котра орґанізує лїтнї школы русиністікы. За веджіня універзіты тогорічных участників привітала проректорка, професорка Івана Цімерманова, і за орґанізаторів Зденка Цітрякова з Інштітуту русиньского языка і културы ПУ, і професор Павел Роберт Маґочій із Торонтьской універзіты в Канаді, якый є і лектором на лїтнїй школї.

Лїтню школу дотеперь абсолвовало 209 участників, з того было 136 загранічных – з Нїмецька, Австрії, Швейцарії, Україны, Польщі, Чеськой републікы, Булгарії, Сербії, Споєных штатів Америкы, Канады, Арґентіны і Чіны.

Тот рік має лїтня школа 26 штудентів, з того 19 зо заграніча. Суть то штуденты із Споєных штатів Америкы, Канады, Чеськой републікы, Україны, Польщі, Хорватії, Румунії, Великобрітанії і Японії. Дакотры пришли, бо мають русиньскы корїня, но суть і такы, котры на лїтню школу пришли вдяка своїм професіоналным інтересам.

На Studium Carpato-Ruthenorum ся традічно ведуть лекції по русиньскы і по анґліцькы. Тот рік русиньскый язык по русиньскы учіть Кветослава Копорова, по анґліцькы Каріна Муляр. Історію карпатьскых Русинів у русиньскім языку буде передавати Володимір Фенич, і по анґліцькы Павел Роберт Маґочій.

Лектором етноґрафії по русиньскы є Валерій Падяк, по анґліцькы єй буде передавати Марта Ботікова. Тогорічне Studium Carpato-Ruthenorum має і новоту – лекції русиньской літературы по анґліцькы, котры буде передавати Нік Купеньскый. Мож конштатовати, же лїтня школа і тот рік здобыла в рамках лекторів капаціты русиністікы світового ранґу.

Лїтня школа русиньского языка тырвать три тыжднї, а про штудентів суть приготовлены і супроводны події як творчі дїлнї, навщівы музеїв і історічных памяток повязаных з Русинами і русиньсков културов, ці навщіва Театру Александра Духновіча, на сценї котрого будуть годны тот рік відїти пєсу нашого будителя – Головный тарабанщік.

Позначка редакції: 22. юна 2023 о 16.00 год. участници тогорочной Меджінародной лїтнёй школы русиньского языка і културы возьмуть участь на выставцї выбіру з 50-рочной вытварной творчости Александра Зозуляка.

Петро МЕДВІДЬ, лем.фм. Языкова і ґрафічна управа: АРК в СР.