12. 7. 2019: Вілкул: „Русины існують. Треба їх узнати так, як Мадярів ці Румунів‟.
5-го юла 2019-го року в Закарпатьскій области Україны проходила конференція під назвов Єдина країна: културна і гуманітарна децентралізація. На конференції брали участь політіци, представителї народностных меншын, културно-сполоченьскы орґанізацій і науковцї краю.
На конференції, як інформовав портал Karpatnews, обговорили ся общы проблемы, котры днесь траплять представителїв многых народностных меншын. Присутный быв і Олександр Вілкун із партії Опозічный блок (укр.Опозиційний блок), котрый про редактора порталу Новини Закарпаття опдовів на вопросы односно узнаня Русинів на Україні.
Русинів треба узнати
Редактор у відеу, котре є доступне в сервісїі Youtube, звідать ся Вілкула, ці люде, котрых є в Закарпатьскій области много і называють себе Русинами, мають право так называти ся. Олександр Вілкул, котрый быв у роках 2012 аж 2014 віцепремєром Україны, втогды іщі за Партію реґіонів (укр. Партія регіонів) бывшого презідента Віктора Януковіча, одповів на вопрос редактора єднозначно.
„Русиньска комуніта єствує, і Русины єствують. То факт. І зато до Русинів треба односити ся із решпектом. Русины мають мати вшыткы права народностных меншын, котры суть ґарантованы конштітуціёв,“ повів Вілкул. На конштатованя редактора, же Русины на Україні не суть офіціално узнаны, бывшый віцепремєр повів, же узнаны будуть, кедьже існують.
„Русины єствують, што є обєктівный факт. Самособов, же їх треба узнавати і давати їм можливости про народностный, културный і языковый розвиток,“ продовжовав Вілкул, котрый доповнив, же мають быти узнаны так, як Мадяры, Румуны ці Росіяны.
„Покля на то треба прияти якыйсь законодавчій акт Верьхонов радов, треба го прияти,“ закінчів політік, котрый быв веце раз посланцём Верьховной рады Україны. Остатнїй раз сидїв в україньскім парламентї до ёго розпущіня нововыбратым презідентом Володиміром Зеленьскым.
Опозічный блок не є першый з темов Русинів
Опозічный блок не є новов партіёв на україньскій політічній сценї. По стратї свого впливу у 2014-ім роцїі, і вдяка зосаджіню презідента Віктора Януковіча по діях на Майданї, зробила Партія реґіонів ребрандінґ і змінила назву на Опозічный блок. Зареґістровала ся втогды як нова партія.
Коли Партія реґіонів была при властях, не рїшыла русиньскый вопрос, хоць і в тім часї были загнаны писма од представителїв Русинів Україны і світа, жебы вызнати Русинів. Зміна позіції, котру репрезентує днесь Олександр Вілкул, може быти лем реторіков перед парламентныма вольбами, котры одбудуть ся на Українї вже 21-го юла 2019.
З темов узнаня Русинів Опозічный блок не приходить першый. Тот вопрос вже зазвучав перед тогорічныма презідентьскым выборами. Кедь 30-го януара 2019-го року у Києві проходив зъїзд політічной партії Опозічна платформа – За жывот (укр. Опозиційна платформа – За життя), меджі выступаючіма быв і Іван Чубирко, посланець Закарпатькой областной рады, котрый перед делеґатами повів, же є треба узнати Русинів. Сам означів ся за Русина.
„Треба пропоновати… внести народность Русин, за котрого поважам ся і я,“ повів Чубирко, за што дістав од делеґів київского зъїзду аплавз. Далше продовжовав, же тото Русины жадають вже десятьлїтя, і же в Закарпатьскій области є народность Русин узнана од 2007-го року. Так само припомянув, же в іншых державах як Словакія, Польща, США і Канада, узнають Русинів, лем не Україна. Чубирко говорив у прояві нелем о народсности Русин, але і о русиньскім языку, котрый за ёго словами має Україна узнавати на основі Европской харты о охранїі реґіоналных або меншыновых языків.
Петро МЕДВІДЬ, ЛЕМ.фм, здрой фотоґрафії: www.vilkul.ua,
