12. 7. 2021: Ку закінчіню списованя жытелїв

Дня 13-го юна скінчіло ся асістоване списованя жытелїв на Словакії. Красна сімболіка по тім, што сьме одцвятковали День Русинів. Дякуєме вам, котры сьте при списованю думали на то, же русиньска народность є частёв вашой ідентіты і доповнює розмаїтость Словакії.

Віриме, же ку русиньскій народности ся приголосило векше чісло, як то было при остатнїм списованю десять років тому. Бо цїла декада несла ся в позітівній енерґії і неунавній роботї представителїв інштітуцій.

Завершінём актівностей были кампанї з назвов Рік русиньского села, а главно фінална кампань Сьме Русины. На різных онлайн і офлайн актівностях і наперек тырваючой пандемії сполупрацовало 30 субєктів, 60 добровольників, представителї самосправ. Кампань доказала ословити понад 200 тісяч людей через соціалны сітї, зазначіла дакілько міліоновы чісла зображінь візуалів кампанї. Драгы і фреквентованы місця были лемованы веце як 110-ёма білбордами, а першыраз і біґбордом. Поштовы скринькы сьме засобили 60-ёма тісячами летаків, села плаґатами, радіоспотами, телевізію відеоспотами, прінтовы медії популарізачныма статями, соціалны сітї множестном інтересностей.

Великым і в історії Русинів вынятковым успіхом є реалізація сполочной кампанї, на котру надвязали поступно Русины в Польщі, Чеській републіцї, Мадярьску, Сербії, Хорватії ці Румунії. Выужытя єдного візуалного концепту і слоґану підкреслило важность сполупраці Русинів жыючіх в різных енклавах в рамках країн Европы.

Дякуєме вшыткым добровольникам, професіоналам і нашым особностям залученых до відеокампанї, кедьже без них бы не годна была мати кампань такы розміры. А покля бы нам і кампань не принесла выснены штатістічны даны, принесла нам знаня, же сполупраца і коордінація приносить добгодобы і мірятельны резултаты.

Петро ШТЕФАНЯК, председа Округлого стола Русинів Словакії.