13. 1. 2019: Русиньскый єпіскоп у Торонтї в Канадї

Русиньскый єпіскоп Маріан Андрій Пацак, в сучасности духовный справця капліцї Монастыря Найсвятїшой Тройцї сестер редемпторісток у Вранові над Топлёв-Ломніцї, ся став єпархіалным єпіскoпом Єпархії Святых Кіріла і Мефодія про Словаків візатійского oбряду в Торонтї в Канадї.

В лїтї 2018 року до той функції го меновав  папа Франціск. Є то вызначна подія нелем про ґрекокатолицьку церьков, але і про русиньску народность, бо Маріан Пацак з нёй походить.

Отець Пацак ся народив 24. апріля 1973 року в Левочі. Мать єденадцять сородинцїв, двоми ёго братове суть священиками. Є членов Конкреґації Найсвятїшого Выкупителя – Редемпторістів. Присягу склав 16. авґуста 1997, філозофічны і теолоґічны штудії абсолвовав у Кракові і в Римі, высвяченый за священика быв у роцї 1998 в Монастырю редемпторістів у Михалївцях. На Латераньскій універзітї, в Академії святого Алфонза в Римі, абсолвовав посґрадуалны штудії, шпеціалізовав ся на моралну теолоґію.

В девятьдесятых роках 20. ст. діяв як помічный священик у парафії Стара Любовня, потім як священик чіну у монастырю редемпторістів у Римі при парафії св. Йоахіма. Быв тыж шефредактором Выдавательства Місіонарь і часопису Місіонарь в Михалївцях і єдночасно економом віцепровінції у Старій Любовнї і справцём містной ґрекокатолицькой парафії у Старій Любовнї, священиком чіну в Монастырю редемпторістів у Стропкові. 

Од 2016 року експерно штудує канонічне право і право выходных церьквей на Католицькій універзітї св. Іоана Павла ІІ. в Лублїнї і діяв як духовный справця капліцї Монастыря у Вранові над Топлёв-Ломніцї.

Желаме му успішне діятельство у новій функції єпархіялного єпіскопа ґрекокатоликів у Торонтї і жебы не забывав, якы суть ёго корїня і хто векшынов суть ёго вірници.

(Жрідло: Wikipedia)