13. 11. 2023: Выголосили першых лавреатів Премії імени Мигаля Града
• Рацин актівно публікує в русиньскых літературных алманахах, котры выходять на Підкарпатю, а так само в журналї Отцюзнина.
• Микола Поцко є знамый русиньскый умелецькый фотоґраф. Премію здобыв за многорочный труд фотоґрафа і фоторепортажі, вдяка котрым пропаґують ся різны аспекты русиньской културы.
В пятніцю, 10-го новембра 2023-го року, Русинськоє літературно-культурноє общество, яке діє на Підкарпатю, выголосило на своїм офіціалнім сайтí на сітí Facebook першых лавреатів Премії імени Мигаля Града – за розвой і пропаґованя русиньской културы.
Номінації были в двох областях, конкретно в катеґорії література, і катеґорії култура. За літературу лавреатом стала Тетяна Рацин, за културу Микола Поцко.
Премія імени Мигаля Града
Русинськоє літературно-культурноє общество іщі в септембрí того року оголосило, же основать дану премію, котра несе мено по русиньскім поетови і першім пердседови Союза русиньскых писателíв Закарпатя, на котрого дíятельность теперíшнє общетво надвязує.
Як втогды основателí інформовали, премія має каждый рік вручати ся русиньскым умелцям Підкарпатя – літераторам, малярям, фотоґрафам, скулпторам і музикантам, за їх вклад до розвоя і пропаґації русиньской културы і літературы.
Премію вырáшыли вручати все 10-го новембра, коли припоминаме собі день народжіня Михаіла Града.
Першы лавреаты
Як вше было спомянуто, першыма лавреатами стали Тетяна Рацин і Микола Поцко. „Поетка Тетяна Рацин, хоць обявила ся в русиньскій літературї недавно, но своёв актівностёв, стараннов роботов над словом, заслужыла на высоку похвалу,“ пише орґанізатор премії.
„Ёго обєктів зафіксовав чісленны културны події, учінивши їх достойныма про шырокый круг людей. Ёго роботы всокотять память на красны події про будучі поколіня.“
Михаіл Град
Михаіл Град (рр. 1950 – 2021), по котрім є премія названа, быв русиньскый писатель, поет і публіціста, довгорочный председа Союзу русиньскых писателїв Закарпатя.
Написав книжкы на російскім, україньскім і русиньскім языку, в котрых є історія, поезія і співанкы Русинів. Меджі нима Сердце солдата, Чари земні, Закувала Зозулиця, Сини Марамороша, Марамороські наспіви, Русинські писателі Закарпатя, Русинські співанкы Марамороша, Талановита Тячівщина, Проміння серця, Тячів – місто моє.
Петро МЕДВІДЬ, ЛЕМ.фм, языкова і ґрафічна управа: АРК в СР.
