13. 4. 2021: Підкарпатскій Пут Деревяной Архітектуры має новый сайт. Част памятників мож обзерати хоснуючы технолоґію VR

На сайті підкарпатского Пути Деревяной Архітектуры вельо ся змінило. Інтернетову страну узуполнили новым змістом і фотоґрафіями вынятковых памятників. Завдякы сучасній технолоґіі туристы можут обзерати выбраны обєкты в віртуальній реальности, в тым кольорову церков в Святковій Великій.

Сайт sad.podkarpackie.travel, якій презентує цікавы памятникы деревяной архітектуры в підкарпатскым воєвідстві, перешол метаморфозу. «Новый зміст, котрый приносит цікавы інформациі про обєкты заклятой в дереві спадковины, зілюструвано знимками памятників» – інформує Сабіна Мермер з Підкарпатской Реґіональной Туристичной Орґанізациі.

Церков в Святковій Великій в технолоґіі VR

На підкарпатскым Пути Деревяной Архітектуры находит ся близко 130 вынятковых обєктів. То головні церкви і костелы, але тіж скансены, маломістецка забудова, а тіж дворкы і палацы.

Завдякы модерным фотоґрафічным технолоґіям выбраны обєкты, якы находят ся на пути, мож онляйново звидіти. «Кольорова церков в Святковій Великій, деревяный костел в Лютчы ци церков в Ґорайци завдякы технолоґіі VR сут доступны на сайті в полній красі. Тоты місця мож обізрити досправды з каждой страны і з вельох перспектив» – пояснят Сабіна Мермер.

Перлины підкарпатского Пути Деревяной Архітектуры

В віртуальну прогульку по деревяных памятниках можут выбрати ся і туристы з заграниці, бо зміст на сайті доступный є додатково в анґлицкым і украіньскым языках. Схоснувано тіж механізмы дозваляючы перезерати сайт особам, котры мают проблему зо зріньом.

Візитныма картами підкарпатского Пути Деревяной Архітектуры сут обєкты UNESCO та Музей Народного Будівництва в Саноку. Саноцкій скансен єст найвекшым в Польщы, вірні оддає климат бывшых сел і місточок полудньово-східньой Польщы. Зато підкарпатскы храмы вписаны на Листу Світовой Спадковины UNESCO то штырі церкви: лемківска в Туряньску та в Радружы, Смільнику і Хотынци та два костелы: в Близным і Гачові.

«Тоты і інчы приміры деревяной архітектуры злокализуваны сут на девятьох трасах, котры можут быти і пропозицийом, як провести час в підкарпатскым воєвідстві. Шырше о трасах мож почытати на одсвіженым сайті Пути Деревяной Архітектуры» – додає Сабіна Мермер. Опрацуваны трасы то напр. саноцко-дукєльска, коросняньско-березівска ци саноцко-дынівска. Перша з них обнимат лемківскы церкви в Гыровій, Команчы, Котани, Крампній, Вільхівци, Перегримці, Репеди, Святківці, Святковій Великій, Щавным і Туряньску та забудову Яслиск.

Модернізация сайту Пути Деревяной Архітектуры былa можлива завдякы фінансовій підпорі Евросоюзу в рамках Проґраму Трансграничной Спілпрацы Польща-Білорусь-Украіна 2014-2020. Задачу зроблено в рамках проєкту «Трансграничный Пут Деревяной Архітектуры шансом заховати унікатовый доробок культуровой спадковины польско-украіньского погранича реализуваного Підкарпатском Реґіональном Туристичном Орґанізацийом в партнерстві зо Стоваришыньом Самоурядів ‘Еврореґіон-Карпаты-Украіна’».

Наталія МАЛЕЦКА-НОВАК, ЛЕМ.фм

(Публікуєме в оріґіналї – лемківскім варіантї русиньского языка.)