13. 5. 2022: Послианцї ПСК роздїлили свої дотації. До реґіонів піде 1,86 міліона евр

Грошы роздїлёвали у штирёх підпроґрамах.

Посланції Пряшівского самосправного краю (ПСК) схвалили на своїм засїданю 9-го мая 2022-го року роздїлїня своїх дотацій. Цїлково роздїлили 1,86 евр у штирёх підпроґрамах – шпорт, култура, соціалны службы і родинна самосправа, інформовала Леа Геілова з Оддїлїня комунікації і пропаґації ПСК.

„І вдяка посланецькым дотаціям можеме сістематічно розвивати нашы реґіоны, што ня барз тїшыть, бо іде о адресну поміч, котра є меджі самосправами і орґанізаціями барз облюблена,“ повів председа ПСК Мілан Маєрьскый.

Як додав, тот рік в рамках дотачного проґраму підпорили і родинну самосправу, чім ся „одкрыли дверї про далшы інштітуції, котры можуть жадати підпору своїх намірів.“

Понад 600 жадостей

До Вызвы посланцїв ПСК было загнаных 607 жадостей, з того підпореных было 530 жадателїв. В проґрамі шпорт здобыло дотацію 191 субєктів в сумі понад 713 тісяч евр. Грошы мають іти на оддыховы зоны, накуплїня шпортового серсаму, будованя, модернізацію і реконштрукцію шпортовых і дїтячіх ігріщ ці на притулок.

В проґрамі култура депутаты схвалили 294 жадостей в сумі понад єден міліон евр. Дотації ся схоснують на выбавлїня і модернізацію културных домів, выбавлїня фолклорных ансамблїв, реконштрукцію храмів, орґанізацію подій і фестівалїв, але так само з них буде робити ся рештавраторьске баданя.

На соціалны службы піде скоро 84 тісяч евр у 26-ёх підпореных жадостях. В рамках родинной самосправы пюосланцї підпорили 19 жадателїв сумов майже 55 тісяч евр. Тоты грошы підуть на різны родинны події, выбавлїня клубовнї і чаёвнї, ставебны роботы в просторах про сеніорів ці оддыховы зоны про родины з дїтми і сеніорів.

Тот рік і партіціпатівный розрахунок

Вызва посланцїв ПСК є лем єднов із штирёх ґрантовых схем Пряшівского краю. Самосправа давать дотації і в рамках Вызвы председы ПСК, при котрій ся в тім роцї роздїлить 500 тісяч евр.

Рекордна сума 3,7 міліона евр є тот рік становлена на Вызву про реґіон, о котрій будуть послєанцї вырїшовати на найблизшім, юновім засїданю. Тогорічнов новотов є Вызва партіціпатівный розрахунок з алокацёв 130 тісяч евр, о котрій вырїшовали в апрілю жытелї ПСК.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР