13. 6. 2023: 22-ый Духновічів Пряшів уж має свого лавреата

В понеділёк, 12-го юна 2023-го року, на сценї Театру Александра Духновіча в Пряшові одбыло ся фінале Духновічового Пряшова 2023 – цїлословацького конкурзу в декламації русиньской поезії, прозы, властной творчости і малых сценічных форм.

Змагаючі, котры поступили з окресных конкурзів, тот рік припомянули собі і 220-ту рочніцю народжіня нашого будителя, по котрім є назване тото свято русиньского літературного слова. Єдночасно была подія, так як і в минулых роках, частёв святковань Дня Русинів Словакії, котрый в календарі маєме якраз 12-го юна.

 

Молитва на гробі Духновіча

22-ый рочник Духновічового Пряшова зачав дакус нетрадічно. Участници конкурзу рано зышли ся в Ґрекокатолицькім катедрарлнім соборі святого Йоана Крестителя у Пряшові, жебы помолити ся панахіду за отця Александра Духновіча, котрый є в кріпті під собором похованый.

Панахіду, котра была в церьковнославяньскім языку з частями в русиньскым языку, служыли священици з Общества святого Йоана Крестителя – отець Мілан Ясик і отець Франтішек Крайняк.

Головный служытель, отець Ясик, мав і кутрый приговор, в котрім спомянув, же Александер Духновіч по тій катедралї ходив, молив ся в нїй, служыв, мав у нїй честне місце в крылосї каноника, а під храмом є і похованый, зато сьме ся днесь ту зышли, жебы оддати му честь і помолити ся.

По панахідї вже дїти із своїма педаґоґами, родічами, але і далшыма гостями події одышли до нашого театру, жебы вказати свої декламачны способности.

 

Конкурз одкрыв председа РОС

По вступных словах модератора події, актора Театру Александра Духновіча Володиміра Рогача, на сцену вышов председа Русиньской оброды на Словеньску Мартін Караш. Председа за головного орґанізатора поздоровив вшыткых участників і зажелав їм успіхы.

Пак ся вже представила тогорічна журї, котра мала што робити, бо довєдна вшыткых змагаючіх ся было майже 70.

Журї то рік была в складі: Маріан Марко, директор Театру Александра Духновіча і председа журї, русиньска писателька Людміла Шандалова, довгорічный актор нашого театру Іґор Латта, Наталія Гребікова, котра є редакторков русиньского высыланя Народностно-етнічного высыланя Радія Патрія в Кошыцях, і Михал Павліч з Інштітуту русиньского языка і културы Пряшівской універзіты в Пряшові, якый науково занимать ся русиньсков літературов.

 

Різны реґіоны і шыроке вікове спектрум

Як было спомянуто, на цїлословацьке змаганя до Пряшова пришло нецїлых 70 участників, но треба підкреслити, же то ани здалека не суть вшыткы, котры тот рік до конкурзу залучіли ся.

Од місяця май проходили окресны або реґіоналны конкурзы, і так вшыткы русиньскы окресы мали свої домашнї змаганя. Цїлково так чісло дїтей залученых до Духновічового Пряшова было омного векше, бо до Пряшова поступили лем тоты, котры у своїй катеґорії в окресї або реґіонї скінчіли на першім місцї, вынятково на другім.

В Пряшові были дїти з окресів Бардеёв, Гуменне, Меджілабірцї, Свідник, Снина, Стара Любовня, але пришла і участничка з цалком словацького реґіону – Баньской Быстріцї.

Змагаючіх мав Духновічів Пряшів так само у вшыткых віковых катеґоріях, од дїтей матерьскых школ, аж по дорослых людей, котры пришли з властнов творчостьов. Не чудо, же журі окрім оцїнёваня окремых катеґорій мала доста роботы і з тым, кого выбрати за лавреата.

 

Лавреатами стали маленькы „акторы“

Наконець пришло рїшіня, же Лавреатом Духновічового Пряшова 2023 суть школярї Основной школы в Радвани над Лабірцём – Патрік Ясик, Марко Потома, Ларіса Схіртова і Хрістіна Схіртова, котры выступали в першій віковій катеґорії з малов сценічнов формов під назвов О козлятках. Дїти пришли досправды добрї приготовлены, а не забыли ани на важный театралный елемент – властну сценоґрафію.

За головного орґанізатора – Русиньску оброду на Словеньску, хочеме іщі раз подяковати вшыткым, котры дали свій вклад до далшого успішного рочника Духновічового Пряшова.

Вшыткым орґанізаторам окресных або реґіоналных конкурзів, членам журї в містных конкурзах і в Пряшові, але головно педаґоґам, котры роблять з нашыма дїтми, учать їх декламовати, ведуть їх ку нашому літературному слову. А не мож забыти на подяку родічам, котры звірили свої дїти тым педаґоґам, жебы могли розвивати ся в русиньскім языку.

Тїшыме ся на далшый, вже 23-ій Духновічів Пряшів о рік, і маєме надію, же знова то буде красна переглядка нашых шыковных дїтей і дорослых, а головно нашого красного русиньского слова.

РЕЗУЛТАТЫ ДУХНОВІЧОВОГО ПРЯШОВА 2023

0-ТА КАТЕҐОРІЯ

0-та катеґорія – поезія

  1. Барбара Матурканіч – МШ Духновічова, Меджілабірцї
  2. Олівія Вінерова – ОШ і МШ А. Духновіча, Уліч
  3. Амалія Марковічова – МШ Татраньска, Стара Любовня

0-та катеґорія – проза

  1. Патрік Ясик – МШ Радвань над Лабірцём, і Лукаш Капа – ОШ Цернина
  2. Юліяна Бенёва – ОШ і МШ Камюнка

0-та катеґорія – духовна декламація

  1. Алена Дримакова – Споєна школа Свідник

0-та катеґорія – малы сценічны формы

  1. ОШ і МШ Якубяны – Тімотеа Стемпова, Штефан Василь

 

1-ША КАТЕҐОРІЯ

1-ша катеґорія – поезія

  1. Марош Маюрнік – Споєна школа Свідник
  2. Якуб Корібаніч – ОШ і МШ Стащін
  3. Ема Чагоёва – ОШ Духновічова, Меджілабірцї

1-ша катеґорія – проза

  1. Софія Креттова – ОШ і МШ Камюнка
  2. Гана Чернеґова – ОШ Коменьского, Меджілабірцї
  3. Адела Гаркотова – ОШ і МШ А. Духновіча, Уліч

1-ша катеґорія – народне розповіданя

  1. Адам Матійка – ОШ Ґерлахів
  2. Шімон Байза – ОШ і МШ Кална Розтока

1-ша катеґорія – малы сценічны формы

  1. ОШ Радвань над Лабірцём – Патрік Ясик, Марко Потома, Ларіса Схіртова, Хрістіна Схіртова

 

2-ГА КАТЕҐОРІЯ

2-га катеґорія – поезія

  1. Мартін Пастырьчак – Споєна школа Свідник
  2. Сара Елла Петрушова – ОШ Духновічова, Меджілабірцї, i Павла Росічова – ОШ і МШ Стащін
  3. Татіяна Андрашова – ОШ і МШ Шарішске Ястрабя

2-га катеґорія – проза

  1. Наталія Цуперова – Споєна школа Свідник
  2. Неллі Анна Ґлосікова – ОШ і МШ Камюнка
  3. Амалія Латтова – ОШ Баньска Быстріця

2-га катеґорія – духовна декламація

  1. Мартін Коваль – Споєна школа Свідник
  2. Юліяна Карашова – ОШ і МШ Камюнка
  3. Емма Бобрикова – ОШ і МШ А. Духновіча, Уліч

2-га катеґорія – властна творчость

  1. Домініка Гакунова – Споєна школа Свідник

2-га катеґорія – малы сценічны формы

  1. Споєна школа Свідник – Наталія Цуперова, Лукаш Югас, Ріхард Шпік, Зое Гутнянова
  2. ОШ і МШ А. Духновіча, Уліч – Алексіс Вінерова, Нїна Грустічова, Леа Ковалёва

 

3-ТЯ КАТЕҐОРІЯ

3-тя катеґорія – поезія

  1. Наталія Чагойова – ОШ Духновічова, Меджілабірцї
  2. Ванеса Паліґёва – Споєна школа Свідник
  3. Біанка Бандурічова – ОШ і МШ Убля

3-тя катеґорія – проза

  1. Александра Зимова – ОШ і МШ Камюнка
  2. Яна Чургова – ОШ і МШ А. Духновіча, Уліч
  3. Наталія Залецька – ОШ Духновічова, Меджілабірцї

3-тя катеґорія – духовна декламація

  1. Катарина Выґодова – Споєна школа Свідник
  2. Домініка Джофкова – ОШ П. О. Гвієздослава, Снина

3-тя катеґорія – народне розповіданя

  1. Самуел Прибиш – ОШ і МШ Якубяны

3-тя катеґорія – властна творчость

  1. Софія Янцурова – Споєна школа Свідник

3-тя катеґорія – малы сценічны формы

  1. ОШ і МШ А. Духновіча Уліч – Яна Чургова, Адела Чопакова

 

4-ТА КАТЕҐОРІЯ

4-та катеґорія – поезія

  1. Вероніка Ясикова – Ґімназія св. Йоана Златоустого, Гуменне
  2. Терезія Антошова – Споєна школа Свідник
  3. Александра Пастернякова – Ґімназія Бардеёв

4-та катеґорія – проза

  1. Вікторія Шантова – Ґімназія св. Йоана Златоустого, Гуменне

 

5-ТА КАТЕҐОРІЯ

5-та катеґорія – властна тврочость

За участь удїлены діпломы Миколаёви Коневалови і Марії Кундратовій.

Script logo