13. 8. 2022: Oбсерваторія в Розтоках буде мати нову стрїху

На обєктї Обсерваторії в Розтоках, окрес Свідник, котра была збудована в 1930-ых роках, вымінить ся стрїха. ПСК на то дасть 200 тісяч евр.

Як інформовала Леа Геілова з Оддїлїня комунікації і пропаґації Пряшівского самосправного краю (ПСК), реконштрукція на будинку, котрый служыть інтересуючім ся о астрономію як простор про одборны актівности і уквартелёваня, бы мала быти закінчена до кінця того року.

Стрїха астрономічного робочого місця в Розтоках, котре є шпеціалізованым оддїлїнём Піддукляньского освітнёго центра у Свіднику, перейде од септембра реконштрукціёв, котру зафінанцує ПСК як зряджователь інштітуції, і проінвестує на тых роботах довєдна 200 тісяч евр.

В рамках реконштрукції комплетно вымінять ся деревяны шындлї за новы, в цїлковім вымірї 520 квадратных метрів. Ручно робленый шындель ся законзервує, зробить ся ізолація стрїхы, зреконштруованы будуть пошкоджены части облаків, а затеплить ся і веранда.

94-рочный обєкт быв збудованый як деревяна зрубова ставба, часточно підпівнічена. Будова служыть як обсерваторія з можливостёв уквартелёваня про 30 особ у двох апартманах і пятёх ізбах. В ареалї є і кухня, їдалня а сала про лекції. Послїдня велика реконштруцкія там проходила у 2003-ім роцї.

 

Петро МЕДВІДЬ, ЛЕМ.фм. Ґрафічна і языкова управа: АРКСР. Фото: Яно Штовка, MQEP.