14. 2. 2023: ПСК схвалив грошы на Варголів музей. На ґрантовых проґрамах роздїлить 2 міліоны евр
В понедїлёк 13-го фебруара 2023-го року одбыло ся засїданя Заступительства Пряшівского самосправного краю (ПСК).
Крайскы посланцї окрем іншого занимали ся ґрантовыма проґрамами ці схвалїнём грошей на реконштрукцію Музея модерного уменя Енді Варгола в Меджілабірцях. Варголів музей може по понедїльковім засїданю крайского заступительства одкрыти нову капітолу своёй історії.
Грошы на музей схвалены
Музей модерного уменя Енді Варгола од 2019-го року чекать на реалізацію великой реконштрукції. Тота є нелем барз потребна, бо будова є планім ставі, докінця до нёй вже затїкать через стрїху, але так само має дати музею цалком нову дімензію.
Грошы на проєкт перебудовы музея схвалила словацька влада іщі в роцї 2019 в цїлковій сумі 7,1 міліона евр. До того пришла пандемія, піднятя цїн матеріалів і ставебных робот, а докінця і думкы новой влады зрушыти цїлу дотацію.
Музей при днешнїх цїнах вже рахує з тым, же на реконштрукцію треба понад 12 міліонів евр і крытя тых вытрат не мало дотеперь ґарантоване ани своїм зряджователём, котрым є Пряшівскый самосправный край. Тото ся по понедїьку змінило.
Посланцї єдномысельно на засїданю схвалили фінанчне крытя реконштрукції меджілабірьского музея. Схвалили крытя на суму 12,28 міліона евр, з чого край має к діспозіції од державы 5,1 міліона і буде потребовати іщі 7,18 міліона евр.
Новы пути музейной історії
На схвалїня фінанчного крытя зареаґовав на своїм офіціалнім профілї на сітї Facebook і Музей модерного уменя Енді Варгола. Колектів інштітуції подяковав свому зряджователёви, посланцям ПСК, і вшыткым, котры ку тому рїшіню допомогли.
„Дефінітівно вырїшыло ся о перемінї музея за веце як 12 міліонів евр. По многых проблемах і дословно дакілько ресусцітаціях того проєкту, котрый пережыв ковідовы періоды, маркантне підниманя цїн ставебных матеріалів, складну сучасну добу і много далшых періпетій, одкрываме днешнїм дньом новы пути нашой музейной історії про вас,“ зареаґовав такой в понедїлёк музей, котрого директором є Мартін Цубяк.
Схвалїня фінанчного крытя подля інштітуції значіть, же штохвіля ся з музея стане ставебный обєкт. В часї, коли буде проходити реконштрукція будовы із 1980-ых років, будуе мусити депозіт музея іти до алтернатівных просторів.
„Мусиме вытворити адекватный депозітарь з безпечносного і кліматічного боку. Єднозначно хочеме, жебы зістав у Меджілабірцях з лоґістічных і безпечностных причін, кедьже плануєме орґанізовати екстерьны выставы, і загранічны. Потребуєме мати приступ ку творам,“ повів Цубяк про денник Korzár.
Меджі можливы алтернатівы належать просторы в містьскім домі културы ці бывшой ґімназії. Вырїшыти ся то має за словами Цубяка уж тот тыждень. Директор є пересвідченый, же вшыткы обмеджіня повязаны з реконштруціёв ся легко звладнуть, і о рік на осїнь ся будуть тїшыти вєдно з навщівниками з новых просторів.
На ґрантовы проґрамы тот рік менше
Посланцї Заступительства ПСК вырїшовали і о ґрантовых проґрамах. Два міліоны евр роздїлить тот рік крайска самосправа меджі успішных жадателїв і підпорить проєкты в реґіонах. Край спустив три ґрантовы проґрамы. В порївнаню з минувшым роком крайска самосправа выдїлила на дотачны проґрамы о 4,2 міліоны менше. „І кедь іде в порівнаню з минувшыма роками о меншый паклик грошей, віриме, же ефект прийде і будеме знати далше підпорити якостны і смыслуповны проєкты в краю,“ повів председа ПСК Мілан Маєрьскый. Найвекшу суму грошей схвалили на Вызву посланцїв ПСК, і то в сумі 1,34 міліона евр. На Вызву председы ПСК было схваленых 400 тісяч евр. Далшых 260 тісяч евр схвалили посланцї на Вызву партіціпатівный розрахунок.
