14. 3. 2023: В Ужгородї припомянуть собі рочніцю рукоположіня єпіскопа Йосифа Головача

В ужгородьскім Ґрекокатолицькім Хрестовоздвиженьскім катедралнім соборї припомянуть собі в четверь, 16-го марца 2023-го року, округлу 40-ту рочніцю єпіскопского рукоположіня владыкы Йосифа Головача. З той нагоды буде в соборї одслужена архієрейска літурґія.

Владыка Йосиф Головач быв помічным єпіскопом Мукачовской ґрекокатолицькой єпархії і тітуларьным єпіскопом созопольскым в Хемінонто.

Преосвященый народив ся в Імстичові у втогдышній Чехословакії 11-го авґуста 1924-го року до родины священика Штефана Головача і Іріны Ляховіч. На священика быв рукоположеный блаженим єромучеником, мукачовскым єпіскопом Теодором Ромжом 14-го септембра 1947-го року. До року 1949 служыв священиком в селї Ярок. Пак пришла ліквідація Ґрекокатолицькой церькви з боку комуністічного режіму.

Од 1949-го до 1984-го року працовав у цівілній професії – в медициньскых установах на Підкарпатю. І попри тім далше служыв священиком в ілеґалітї.

15-го марца 1983-го року быв у Караґандї тайным мукачовскым єпіскопом Александром Хіром рукоположеный на помічного єпіскопа. Хіра там быв у выгнанстві. Рукоположіня владыкы Головача по обновлїню Ґрекокатолицькой церькви і Мукачовской єпархії 16-го януара 1991-го року потвердив Святішый Престол і офіціално став помічным мукачовскым єпіскопом і тітуларьным єпіскопом созопольскым.

В тім часї быв за мукачовского єпарху потвердженый далшый тайно рукоположеный єпіскоп Іоан Семедій, як і другый помічный єпіскоп Іван Марґітич, котрый так само прияв єпіскопске рукоположіня тайно.

Владыка Йосиф Головач окрем того выконовав і функцію ректора Ужгородьской богословской семінарії.

Іщі в юни 1990-го року проходив в Римі Сінод єпіскопів Україньской ґрекокатолицькой церькви, на котрый пришов і владыка Іоанн Семедій вєдно з владыками Іваном Марґітичом і Йосифом Головачом, кедьже дістали запрошіня.

На сінодї быв владыка Семедій під тиском з боку україньскых єпіскопів, жебы ёго єпархія приєднала ся до складу україньской церькви. В тій думцї мали україньскы єпсікопи союзника – Івана Марґітича, котрый быв проукраїньского напряму. Наопак, владыка Йосиф стояв вєдно з владыком Іоаном Семедіём на русиньскых позіціях і подарило ся їм утримати окремый статус русинськой Мукачовской єпархії.

Владыка Йосиф Головач вмер в Ужгороді 18-го юна 2000-го року.

Петро МЕДВІДЬ, ЛЕМ.фм. Ґрафічна і языкова коректура: АРК в СР.