14. 4. 2023: Мілан ҐАЙ: Уж нам збігли рочкы, Молитва за дїти, Не глядайте господа, Розсудок (Стихы)

Мілан Ґай

Уж нам збігли рочкы

Уж нам збігли рочкы

маме ту старобу,

зрахує нам крочкы

на цінтерь, до гробу.

 

Як ся жывот зачне

мусить і скончіти,

хоць нам буде тяжко

тот світ охабити.

 

Снажме ся тот куртый час

як найлїпше жыти,

жебы сьме го перед Бога

могли предложыти!

 

Няй на нїм Господь не найде

нияку провину,

і до Царьства няй нас прийме,

як свою дїтину.

 

Молитва за дїти

Благослов нашы дїти, Господи,

благослов  і нас, родічів,

в дїтёх послав єсь нам потїшіня

до нашых родин на велё років.

 

Бог нам послав тот взацный дар,

жебы сьме дїточкы выховали,

у звязцї нового жывота

щастный жывот про них мали.

 

Бо одповідность, яку нам дав Господь,

стоїть главнї на родічах,

указати дїтём драгу до неба,

прикладом быти – у жывотї і скутках.

 

Хто, кедь не тато научіть, укаже,

до сердця свого пригорне зрана,

і мама, котра обійме Тебе, притулить

любвов, нїжностёв, што їй од Бога дана.

 

Жебы  дїти вашы пішли до неба,

то  вам, родічaм, молити ся треба.

Бо чекать ту на них зависть, злоба,

то велика про вас у жывотї проба.

 

Жебы їх не збив із драгы лукавый,

і жебы остали они в чістотї,

няй не зазнають грїха отраву,

тай не блукають ся по ночі.

 

Знічме мы зато ёго планы,

будьме вітязьми із ним у битві,

то є желаня мам, татів, баб і дїдів

з тым врагом душ, што наш світ обсїв.

 

Неуспішны так будуть ёго наміры,

жебы зблуджены далше могли іти.

Поставме ся проти – хрістіане!

За лїпшый жывот, за нашы дїти.

 

Выслухай Боже наше одрїканя,

няй зачуєш тото з высоты,

попозерай на наш жывот, страданя,

провадь нас жывотом там, де і Ты.

 

Няй Твоє око на нас меркує,

з драгы довіры впасти нам не дай!

Жебы діявол не зводив нас,

няй душы нашы не стратять Рай!

 

Ты здолав претяжку дорогу

в страданях на гору Ґолґоту,

в болестях за нас жывот положыв,

і так дверї до неба нам одкрыв.

 

 Не глядайте Господа 

Не глядайте Господа, він коло Вас

коли Вы вірите в нёго,

в кажду годину і в будькотрый час,

вы не зрїкайте ся ёго.

 

Кедь душу вашу пристигне неістота

і войде до нёй страх, непокій,

знайте, Господь є всягды коло Вас

на вашій  дорозї нелегкій.

 

Дбайте за свій духовный жывот,

намірьте ся на честну дорогу,

і не довольте думкам лукавым

противити ся Господу Богу.

 

Храньте ся світьского грїха

і покушіня обходжайте,

до Господа Ісуса Хріста

із молитвами приходжайте!

 

Бо Бог не є лем на Небесах,

пережывать він і у храмі,

є у Біблії, і в святых книжках,

і коло Вас все є, і буде з вами.

 

Xoць го не відять вашы очі,

бо і грїшникам ся часом зъявить,

через такых вірників як вы

і в безвірцїв є, їх благословить.

 

Дякую Тобі, Створителю мій, Боже,

Тебе я у своїм жывотї прославлям,

все до Тебе велику любов чую,

не лем коли приходжам у храм.

 

Поблагослов, Ісусе,  день насущный,

до котрого вставаме кажде рано.

Од зла і неправды охранюй нас,

так, як у Святім писмі писано...

 

Розсудок

Пілат, што сидїв на златім тронї,

попросив ся: „Ісуса пустити?‟

А народ на дворї закрічав:

„Він мать быти розпятый на крестї!‟

 

Памнятайте, бо дораз Пасха.

Варава злодїй, но він невинный.

І знова люде крічати зачали:

„Не є наш царь. Розпний го! Розпний!‟

 

Забрав на себе людьскы жалї,

крічать на нёго і высмівають.

Не знають што роблять, не розумлять,

же Бога на земли розпинають.

 

Плакали над ним добры і честны,

ученикы ёго, і сам день плакав....

„Не плачте і не заводьте! Я воскресну!

Так, як єм вам то повідав‟.

 

А він воскрес – настало чудо

коло своёго нянька став,

жывый є, душы нашы судить,

так, як він нам предповідав.

 

Ісус воскрес! Ожыло сердце в грудёх.

Ісус воскрес! Бо жывый зышов з креста.

Ісус воскрес! Пасха є доказом того,

же лем у Бога наша істота...

(Выбране з Літературного конкурзу Марії Мальцовской, рік 2022)