14. 5. 2023: На Маґурі посадили Ліс Памяти Йоана Павла ІІ

Віцеміністер климату і середовиска Едвард Сярка вєдно з робітниками Надлісництва Ґорлиці, але тіж скаутами, мундуровыма службами, представниками локальных власти посадили близко 1400 дерев на Маластівскій Перегыбі. Акция саджыня дерев прошла 8. мая в рамках ініциятивы «Лучат нас Дерева». Буде то четвертый в Малопольщы Ліс Памяти Йоана Павла ІІ.

«Акция Лучат нас Дерева зачала ся два рокы тому з мойой ініциятивы. Думали сме, як дотерти до соспільности з добром ідейом звязаном з охороном природы. Наша акция дозвалят каждому з нас підняти індивідуальны діяня для природы» – повіл віцешеф ресорту климату і середовиска.

1400 новых дерев

В Малопольщы посадили уж разом штырі Лісы Памяти Йоана Павла ІІ. Першый находит ся на обшыри лісництва Хелмєц, другій на убочах Павловской Горы в Надлісництві Коростенко, а дальшый – на обшыри Надлісництва Лиманова.

«Єм під великым вражыньом заанґажуваня локальных соспільности в саджыня Лісів Памяти Йоана Павла ІІ. То доказ, што важна є для нас і природнича спадковина, і вшануваня памяти Папы Поляка» – додал віцеміністер.

На Маґурі посадили 1400 дерев, серед них і шпильковы, і листясты. Нич іщы зачали садити, голос забрали м.ін. посланкыня Барбара Бартусь, сенатор Віктор Дурляк, Юзеф Леґутко – надлісничый Надлісництва Ґорлиці та Павел Щыґєл, директор Реґіональной Дирекциі Державных Лісів в Кракові. Римокатолицкій священник о. Роберт Бєлецкій з парохіі св. Максимілияна Кольбе в Крампній коротко полил ся і посвятил саджінкы.

На Маґурі находит ся воєнный цмонтір но 60 з часів І світовой войны. Присутны на акциі саджыня дерев зложыли там квітя. Посліднім пунктом было одслонити обеліск з упамятняючом таблицьом. Помістили на ній цитуваня з апостольского листу Familiaris Consorti авторства папы Йоана Павла ІІ: «Ліс єст єдным з найвекшых дарів натуры для чловека».

Наталія МАЛЕЦКА-НОВАК, ЛЕМ.фм. Фот.: gov.pl

(Публікуєме в оріґіналї – лемківскім варіантї русиньского языка.)