14. 7. 2023: Вмер русиньскый писатель Михаіл Чухран

Із Підкарпатя пришла смутна вість, же 13-го юла 2023-го року перестало бити сердце русиньского писателя і актівісты Михаіла Чухрана. Люде го знали як чоловіка гумору, а він до остатнёй минуты быв повный гумору а доброго настроїня.

Народив ся Михаіл Чухран 23-го новембра 1954-го року в Королеві на Підкарпатю. На Ужгородьскій державній універзітї закінчів Хемічну факулту, і за тым фахом робив наперед у Львові, пак в Хустї, де ся приженив.

По пару роках перебрав ся жыти до родного Королева, де зістав аж до смерти. Робив у виноградівскій містьскій телевізії Виноградов-ТВ, одкыль ішов на пензію. В телевізії быв автором і ведучім множества проґрамів, в тім чіслї і русиньскых, наприклад Фіґлї тыждня, Наша бесїда, Срїберны струны.

Меджі тым писав віршы, гуморістічны але і філозофічны, котры вже меджі народом стали штось як фолклор. І до послїдньой хвилї людей обвеселёвав своїма віршами, фіґлями на сітї Facebook. Ёго творы мож было чути на різных фестівалах, концертах, але і в школах ці матерьскых школах, бо творив і про дїти, а дїтей барз любив.

Кедь у 2016-і роцї зачав на Підкарпатю выходити културно-белетрістічный журнал Отцюзнина, Михаіл Чухран од початків быв єдным із авторів, котры в нїм публіковали. І теперь, в першім чіслї, котре якраз вышло по дакількорочній перерві, Чухран быв меджі авторами журналу.

Так само творы Чухрана были друкованы в шторічній публікації „Алманах днешньої русинської літературы‟, якый выдає Закарпатьске областне научно-културолоґічне общество імени Александра Духновіча і Русиньскый културолоґічный клуб. Тексты Михаіла Чухрана мож было чітати і на сайтї rueportal.eu.

Михаіл Чухран мав выданы і властны книгы, а сам быв выдавателём і редактором многых публікацій. Як сьме вже споминали, писав про дорослых і дїти. Спід ёго пера вышла і публіцістіка ці історічны статї. Публіковали го і Русины поза граніцями Підкарпатя – в Чеській републіцї, Словакії, Румунії ці Мадярьску.

Нелем літературно актівізовав ся Михаіл Чухран в русиньскім русї на Підкарпатю. Быв актівный і в русиньскых обществах. Быв головов Виноградівского общества імени Александра Духновіча. Стрїчати го люде могли на многых русиньскых подіях, конференціях, презентаціях, фестівалах ці на памятмых подіях, котры містны Русины орґанізовали.

Русиньска література пришла смертёв Михаіла Чухрана о великый талент і барз плодного автора. Вічная память!

Петро МЕДВІДЬ, ЛЕМ.фм, языкова і ґрафічна управа: АРК в СР.