14. 9. 2020: Детектор лжи: Перенесена премєра уж в пятніцю

Русиньскый Театер Александра Духновіча рихтовав на зачаток апріля 2020-го року премєру пєсы сучасного російского автора Василія Сиґарєва під назвов Детектор лжи. Нажаль, по приятю рештрікцій повязаных із пандеміёв была премєра перенесена на навЫй датум. Пєса, котру режійно приготовив в нашім театрї вже знамый режісер Светозар Спрушаньскый, якый про Театер Духновіча векшынов робить пєсы російскых авторів, буде мати наконець премєру в пятніцю, 18-го септембра 2020

Детектор лжи

Повісте собі, же о манжелстві знате вшытко? Досправды то так є? Або… Може о манжелстві не знаме абсолутно ніч? І манжелство може быти єдна велика незнама… А притім прекрасна комедія!

Находиме ся у обывачцї єдного класічного панелакового квартелю. Панї Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити дїла, котры суть на першый погляд баналны. А пізнїше і фаталны. Бо уже по хвілї знайде ся меджі небом і землёв. Лїпше повіджено – посеред таємніць тридцятьрічного манжелского одношіня. Тадь хто бы ся сперав покушіню спознати істинну правду і скрыты світы свого цїложывотного партнера? Нихто. І втогды ся іщі лем почнуть дїла! Минулость шокує нашых ґероїв, метать їх до неочекованых сітуацій. Но публіка ся барз файнї бавить!

Та ці то в жывотї аж таке вітязтво? Дізнати ся о нашых близкых досправды вшытко? Тверду правду? Як скінчіть тота сеанса несподїанок? Подарить ся загасити тот ґротесковый пожар манжелскых боїв? Буде годен в многім простодушный гіпнотізер втечі із пазурів манжелского абсурду?

Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову.

Успішній комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавлїню ся. На дінаміцї акторьской кооперації, іскривости словных несподїванок.

Значіть! Театралный вечур повный доброй забавы, усміху, котрый вам з часу на час замерзне на ротї, сміху і радостного чутя ся може зачати!

Василій Сиґарєв

Василій Сиґарєв (1977) є сучасный російскый філмовый режісер, сценаріста і драматурґ. Є лавреатом премій (по російскы, позн. ред.) Дебют, Антибукер, Эврика, Новый стиль і Evening Standard Awards. Пєсу, котра теперь буде мати премєру і в русиньскім театрї в Пряшові, написав у 2005-ім роцї і оріґінална назва є Продаётся детектор лжи.

Петро МЕДВІДЬ, лем.фм, языкова управа: ред. АРК в СР.