15 . 6. 2022: Варголь, Бенксі, Далі, Пікассо на єдній выставі в Кракові
На єдній выставі в Нацийональным Музею нашли ся передовы модерны артисты: Варголь, Бенксі, Шаґаль, Баскія, Міро, Далі, Ле Корбузъє, Пікассо, Ліхтенштейн. Роботы з приватной колекциі князів Любомирскых першый раз сут вказуваны так шырокій публиці.
Найзнаменитшы творці ХХ і ХХІ ст. будут гостити в Павілоні Юзефа Чапского од 10. червця/юнія аж до 16. жолтня/октобра тр.
Близко шістдесят сиґнуваных назвисками творів веце як двадцетьох вызначных артистів ХХ і ХХІ ст. мож од минулой пятниці видіти на выставі «Сучасна штука з Колекциі Князів Любомирскых» в Павілоні Юзефа Чапского, одділіню Нацийонального Музею в Кракові.
Подорож по аванґарді ХХ і ХХІ ст.
«Є гев пару особливо вартістных обєктів, але вартістю як так є тіж ціліст выставы в такій формі. Вартат звернути особливу увагу на роботы менше знаной в Польщы аванґардовой ґрупы Кобра ци Мерилін Монро Енді Варголя, але не тоту найчастійше репродукувану (…). Для конесерів сурреализму презентуєме выняткову серию робіт Марка Шаґаля і Сальвадора Далі» – вычыслят проф. Анджей Щерскій, директор Нацийонального Музею в Кракові.
Вшыткы презентуваны на выставі роботы: ґрафікы, образы, меблі были зроблены по ІІ світовій войні і звязаны сут з передовыма артистами світовой аванґарды. Окрем знаных з музейных просторів творів такых артистів як Пабльо Пікассо ци Жуан Міро, першый раз на выставі в Нацийональным Музею загостил єден з найславнійшых представників штукы улиці – Бенксі.
Ключом выставы єст перегляд того, што діяло ся в американьскій і европейскій штуці по ІІ світовій войні в ориґінальный спосіб односячых ся до творчости покровителя Павілону – Юзефа Чапского, вказуючы медженародный контекст, в якым розвивало ся малярство того же.
«Залежало мі, жебы запросити публику до артистичной подорожы. Зачынаме од несторів аванґарды, артистів, котры як передова страж торували дорогу в сучасній штуці і черговы етапы модерной штукы» – оповідат Анна Будзалек, кураторка выставы.
Наталія МАЛЕЦКА-НОВАК, ЛЕМ.фм.
(Публікуєме в оріґіналї – лемківскім варіантї русиньского языка.)
Фот. Анджей Банась
