15. 2. 2022: В Підгородї хотять зробити комунітну муштарню

Схосновати овоцину із стромів в сельскім овоцинарьскім садї в русиньскім селї Підгородь Собранецького окресу хотять добровольници з містного обчаньского здружіня і в комунітній добровольній муштарнї.

Тота має выникнути в сутеренї Културного дому. Як аґентуру TASR інформовав Матєй Муха, цїлём той актівности є быти посередником про домашнїх жытелїв при вказаню „скрытого потенціалу овоцины“ і створити в реґіонї традіцію муштованя.

„Ґаздівску муштарню в селї Підгородь не будеме хосновати самы, в першім шорї буде простором про выробу овоцных щав про вшыткых заінтересованых за добровольный фінанчный дар. Мы радо муштованя вкажеме, научіме заінтересованых робити з хоснованыма механізмами,“ повів Муха з тым, же першов великов зорґанізованов подїёв у муштарнї буде сполочне муштованя в осени, почас публічного самозбераня овоцины в містнім овоцнім садї.

Містне обчаньске здружіня о овоцны стромы, з котрыма в минулости ґаздовало підгородьске польногосподарьске дружство, старать ся од зачатку 2020-го року. За два рокы в сельскім садї одпрацовало 40 добровольників довєдна 900 годин.

„І вдяка фіначній підпорї різных фундацій зревіталізовали 1,5 гектара садів і сприступнили 90 старых стромів, котры по роках знова родили, высадили 20 новых стромів інтересных одрод,“ пояснив про аґентуру шеф добровольників Юрай Сеніч. За його словами ідейов проєкту, котрый має назву Сады Вігорлату, є дати домашнім і гостям нагоду на актівно пережытый вольный час і творїня сполочных цїнностей.

Часть овоцины зо садів роздавають школам і домам соціалных служеб в околіцї, з решты вырабляють мушт, котрый давають дарцям як нагороду за фінанчны дары. Окре бріґад, орґанізують про людей курзы з тематіков култівації і старостливости о овоцны стромы.

„Тїшу ся, же молоды в селї мають намагу обновити бывшый потенціал продукції овоцины. Тоты актівности, окрем укрїплїня домашнїх односин, до нас тїгають новых навщівників і розшырюють знаня о нашім реґіонї,“ сконштатовав староста села Підгородь Антон Грицько.

Петро МЕДВІДЬ, Лем. фм. Ґрафічна і языкова управа: ред. АРК в СР. Жрідло фотоґрафії: Pixabay.com.