15. 3. 2022: Юбілейна Карпатьска писанка 2022 вкаже майже 800 експонатів

Як інформовала Яна Федічова із Вігорлатьского музея в Гуменнім, музей 17-го марца 2022-го року одкрывать унікатну выставу великодных писанок в рамках юбілейного XXX. рочника Меджінадорной выставы писанок Карпатьска писанка 2022.

Тот рік выстава презентує унікатну колекцію писанок, котры суть у збірковім фонді етноґрафічного оддїлїня Вігорлатського музея. Експонаты докумнетують стародавну традіцію крашіня писанок в реґіонї вышнёго Земпліна.

За 30 років майже 26 тісяч писанок

Хоць Карпатьска писанка є все повязана з конкурзом, до котрого можуть авторы заганяти свої конкурзны писанкы, тот рік не має подія конкурзный характер і выстава буде одкрыта вез вернісажи і участи авторів.

Майже вісемсто тот рік іншталованых писанок навщівникам одпрезентує найстаршы традічны і найновішы технікы крашіня великодных писанок, котры сохранили ся і далше розвивають в окремых областях Карпатьской котловины. Найвекшов презентованов колекціёв будуть писанкы із Словакії, котра є заміряна на зберательску область Вігорлатьского музея.  Із згранічных писанок буде найвекша колекція з Україны, але будуть там і писанкы з Польщі, Мадярьска, Чеськой републікы, Румунії ці Споєных штатів Америкы.

Подля слов Федічовой, почас дотеперешнїх рочників Карпатьской писанкы ся одпрезентовало понад 500 авторів із вшыткых реґіонів Словакії, пізнїше і зо заграніча. Музей за тридцять років выставлёвав майже 26 тісяч писанок.

Цїнны писанкы з Комомыї

В рамках Карпатьской писанкы 2022 буде выставлена і унікатна колекція писанок із Націоналного музея народного уменя Гуцулщіны і Покутя в містї Коломыя. В подарованій колекції є і репліка писанкы із 15-го столїтя.

Меджінародну выставу доповнюють великодны декорачны предметы од писанкарів із Совакії, Україны і Польщі. В Ґалерійній салї Ореста Дубая Вігорлатьского музея в Гуменнім буде выстава Карпатьска писанка 2022 приступна до 19-го юна 2022-го року.

Петро МЕДВІДЬ, ЛЕМ.фм, ґрафічна і языкова управа: ред. АРК в СР.