15. 3. 2023: ТАД одпремєрує пєсу Іванов од Чехова
• Владиміра Штефанікова і Oсиф Пантлікаш – герцї Театру Александра Духновіча, котры выступають у пєсї Іванов Антона Чехова.
В пятніцю, 17-го марца 2023-го року, Театер Александра Духновіча в Пряшові на своїй Великій сценї одпремєрує пєсу Іванов од Антона Павловіча Чехова. Режісером новой пєсы в репертоарї русиньского театру є Светозар Спрушаньскый.
Як приближує дїю пєсы театер, главный герой інсценації не розуміє самого себе. Колись давно быв повный жывота і енерґії. Общественно анаґажовав ся, ініціатівно мінив дїла ку лїпшому.
„Актівно глядав путь до людей, до лїпшых завтрашнїх днїв. Днесь го нїч не інтересує. Ани властне жытя, ани тоты остатнї, ани довгы, котры наробив, і котры затяжують ёго маєток. Колись любив свою жену, котру їй родина з причіны ёго віры одшмарила і выдїдила. Але днесь єй вже не любить. Не докаже єй любити. Хоць знать, же штохвіля вмре,“ приближує театер.
Як далше інформують творцёве новой пєсы, Іванов є отровленый безнадійныма обставинами в сполочностии. Вшыткыма, котры суть коло нёго. Топить ся в безцїлёвости, безнадії, всягды присутній нудї.
„Стратив будьяку енерґію, дяку жыти. Ёго душевна пустота оддзеркалює общій холод, аґресівность, поверьхность, незначность і безоглядность навколишнёго світа. Но він чує потребу прінціпіалной зміны. Але не докаже єй зреалізовати.“
Главну роль Николая Алексеєвіча Іванова грать Євеґній Либезнюк, ёго жену Сару – Анну Петровну, Владиміра Штефанікова і Ярослава Сисакова. Сцена, костімы і выбер музикы суть під тактовков режісера Спрушаньского.
Перша „велика“ пєса Чехова з назвов Іванов мала премєру у 1887-ім роцї. Но їй характеры доднесь зособнюють вшыткы людьскы односины, тугы, сны, слабости, страхы, міцны сторінкы і неуспіхы. А іщі і жывше як колись.
Автор їх „рисує“ невіроятно продумано і правдиво. Значіть – траґікомічно. Зато суть нам і днесь такы близкы. Чехов своїм тіпічно лаконічным способом додавать: „Жаден роман, ани театрална пєса не докаже перевышыти наш досправдовый жывот в ёго абсурдности.“
Перед пятніцёвов премєров, яка має звычайный початок о 19.00 год., одбуде ся о пів семой і одкрытя выставы вызначного фотоґрафа і подникателя Ярослава Шуркалы під назвов Чаро театралной фотоґрафії. Выставка, котру театер орґанізує вєдно із СНМ – Музеём русиньской културы в Пряшові, пак буде в просторах театру приступна до 31-го мая.
Петро МЕДВІДЬ, ЛЕМ.фм. Ґрафічна і языкова коректура: АРК в СР.
