15. 4. 2021: Делеґация зоз Словацкей нащивела Руски Керестур

РУСКИ КЕРЕСТУР – У Руским Керестуре вчера пребувала делеґация з Републики Словацкей зоз Уряду за Словацох котри жию за гранїцу, на чолє з директором Миланом Яном Пилипом (позн. ред.: на фото в центрї), котри по народносци Русин, активни у русинским руху, а Русинох представя у державним совиту за национални меншини. Зоз словацку делеґацию присутни бул и заменїк амбасадора Републики Словацкей у Беоґрадзе пан Иґор Венцел (позн. ред.: на фото вправо).

Зоз домашню Олену Папуґа, госци нащивели Школу Петро Кузмяк дзе их привитала о. д. директора Наталия Будински хтора госцох упознала зоз тим як функционує образованє на руским язику, од першлосци по нєшкайши час.

Госци потим як опатрели Школу нащивели и шедзиско Националного совиту Руснацох дзе их дочекал предсидатель Борислав Сакач и заняти у Служби Совиту хтори го упознали зоз роботу Совиту, а вшадзи ше бешедовало и о потерашнїм сотруднїцтве, та можлївосцох за наступне, нашей заєднїци зоз старим крайом одкаль и пан Пилип походзи.

Нащива госцох далєй одведла до катедралней церкви св. оца Миколая дзе их привитал парох о. Михайло Малацко (позн. ред.: на правій фотцї четвертый злїва) котри их кратко упознал зоз историятом приходу до тих крайох и самей парохиї, а обишли и крипту под катедралу дзе поховани владикове.