15. 7. 2022: Радвань над Лабірцём має з причіны сухот проблем з водов

Актуалне сухе лїто, як і дакілько попереднїх, примусило жытелїв русиньского села Радвань над Лабірцём, Меджілабірьского окресу, проглублёвати студнї.

Як про аґентуру TASR повіла старостка села Яна Свічінова, при єднакім ставі клімату то в слїдуючіх роках не буде мусити быти рїшінём. „Мы досправды в сітуації, же в нас є вода понад золото, сітуація з рока на рік є гірша. Досправды не знам, што буде далше, люде боять ся о воду,“ повіла старостка.

В Радвани на Лабірцём не є публічного водоводу, жытелї суть одказаны на властны студнї. Намагы выбудовати сільскый водовод мав уж попереднїй староста. Но їднаня з Выходословацьков водарьсков компаніёв скінчіли лем коло проєкту на зачатя процесу, пак з капацітных і фінанчных причін водарнї од того одступили.

Водовод моментално кінчіть в Грабовцї на Лабірцём, котрый є десять кілометрів од Радвани. Подобный проблем мають подля Сівчіновой і в недалекім Берестові на Лабірцём.

Містны жытелї суть за словами старосткы звыкнены куповати собі паковану воду, на поливаня загород хоснують доджову воду і воду з рікы Лаборець.

„Но і тот нам вже тече лем як потічок,“ говорить старостка, котра кликала із Справов поводя Лабірця, жебы в селї зробили порогы на затримованя воды. Пак за їй словами і уровень воды в студнях бы тримала ся на даякій высотї. Єдночасно конштатує, же таке рїшіня якбач буде проблем з рыбарями і охранарями.

Маленькым позітівом має быти факт, же містна школа є почас лїта заперта. Но покля бы сухе лїто мало продовжовати і далше, в осени то подля Свічіновой може быти в селї „катастрофа“.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Фото: Pixabay.com.