15. 9. 2022: Ґрекокатолицька харіта одкрыла в Снинї Дім святого Пантелеймона

Новы просторы посвятив владыка Петро Руснак.

Ґрекокатолицька харіта Пряшів (ҐКХ) зачала в новых просторах почас 2022-го року в Снинї забезпечовати здравотну старостливость хворым в обыстях через Аґентуру домашнёй здравотной старостливости (ADOS – Agentúra domáce ošetrovateľskej starostlivosti) і соціалны порады посередництвом Соціалного центра Снина.

У віторок, 8-го септембра 2022-го року, ҐКХ офіціално в Снинї одкрыла новы просторы Дому святого Пентелеймона, котры посвятив владыка Петро Руснак, апостольскый адміністратор Пряшівской архієпархії і братїславскый єпарха.

Помогла парохія

В Снинї Ґрекокатолицька харіта Пряшів дїє од 2001-го року. Служба ADOS Charitas была обще першов служвоб на теріторії міста і протопресвитеріату Снина. Тота выникла в тім самім роцї і забезпечовала службы здравотной старостливости в обыстях. Од того часу была ҐКХ із своёв службов ADOS на штирёх різных місцях. І зато глядали ся просторы, котры бы были добры про выконованя той службы.

Подарило ся то вдяка парохії Снина-Берегы і адміністраторови парохії отцёви Даньєлови Шарішскому. Просторы были вдяка парохії зреконштруованы в роках 2018 аж 2021. Інвестіцію до реконштруцкії просторів буде харіта сплачати почас 15-ёх років, і в аренді їх має од новембра 2021-го року.

Навщівлюють понад 20 пацієнтів

Домашню здравотну старостливость забезпечують сестры ADOS у сполупраці з амбулантныма докторами, шпеціалістами, пацієнтом і ёго родинов.

Головным цїлём є выконовати вшытко, што підтримує здравя або помагать выздоровити, припадно помагать ку покійній смерти в природнім соціалнім оточіню. Подля ҐКХ штораз веце людей потребує домашню здравотну старостливость, іде главно о хронічно хворых ці безвладных паціентів із онколоґічныма діаґнозами, сеніорів, але і молодшых.

Актуално в рамках ADOS в Снинї роблять дві сестры, котры денно навщівлять довєдна 20 і веце паціентів у їх обыстях. Таку саму амбулатну службу забезпечує Ґрекокатолицька харіта і в містї Пряшів од року 2000.

Одкрыли і соціалный центер

Ку 1-му апрілю того року в Снинї створили ся і одповідны условії про службу шпеціалных соціалных порад, кедь своє фунґованя почав Соціалный центер Снина. Центер помагать різным ґрупам жытелїв – залежным на алкоголї ці наркотіках, людям без домова, сеніорам, здравотно зневыгодненым, людям і родинам в нуждї, часточно і біженцям із Україны.

Поміч соціалных порад в рамках центра є забезпечована формов особного розговору і гляданя выходу з даной сітуації.

„Орьєнтовати ся хочеме скорїше на тых, котры терплять досправдовов нуждов, і о котрых ся старають духовны отцї, місто Снина, і іншы села а парохії у протопресвитеріатї Снина і Меджілабірцї, припадно нашы парохіалны харіты,“ повів директор Ґрекокатолицькой харіты Пряшів Петро Валічек.

Соціалный центер в рамках єдного місяця поможе і 20-ём людям, а тота соціална служба є безплатна.

Одтеперь має харіта про свої службы вже офіціално одкрыты властны просторы в Домі святого Пантелеймона. На посвячіня тых просторів владыком Петром Руснаком пришли і представителі Пряшівского самосправного краю, міста Снина і орґанізацій, котры з ҐКХ сполупрацують.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.