15. 9. 2023: Елена ХОМОВА-ГРІНЁВА: Одышов покій, Несповнены тугы, На памяти майме!, Обзрю ся за лїтом, Смачнї... (Стихы)

Елена Хомова-Грінёва

Одышов покій

(25. 3. 2022)

 

До сердця скрыю

радость,

няй в згадках

тїшить мене.

Любов не дам

вкрасти никому,

ани, домовино, тебе.

Душу отворю

ключом

раннёй молитвы.

На рoзпутя

понесу на руках

всі кривды.

Мої очі видять

зло, нарекы світа,

выбухы воєн,

смерть в розпуку

жывота.

Одышов покій,

жалостно заплакала

і рыдать земля.

 

 

Несповнены тугы...

З попела выберу

печены ґрулї,

горячі, смачны,

окоштую їх.

Чую обдалеч

пах твого

тремтячого тїла,

біла березко,

фортесіма

і піяна спів.

Цїлый розтрясеный,

не свій

з недоспатой ночі,

не буду тобі

на сміх.

Наїм ся до

сытости доброты,

хоць в голові

морщать мене

несповнены

тугы і сны.

 

 

На памяти майме!

Молитва тиха

сїдать на хотарь,

неодовго тма

прикрыє край.

„Мементо морі‟!

денно варують нас

небеса.

По чорнім небі

звіздочкы горять,

а мы вечірнёв

молитвов просиме

Г о с п о д а

за покій світа, мір,

одпущіня кар

і благодать!

 

 

Обзрю ся за лїтом

Кекешнї обзрю ся

за лїтом,

вітер листя

зо стромів

оддувать.

Малярь з палетов

в руках

надале прекрасно

з фарбами малює край.

Смутком дыхають

опущены гнїзда

пташат.

Отара овець над

головами

ронить слызы,

страшыть перунами,

не стратиш ся,

не заблудиш,

цохь чорнїє небо

ідь допереду,

не обзерай ся

за теплыма днями.

 

 

Смачнї...

Хабзове квітя

назберам в юні,

в зимі лїком мі буде.

При теплім шпаргетї,

в папучах,

на фрыштик

смачнї окоштую

зо солодкым кукелком

і пахнячім

чаём собі.

Смотрю через шыбу

на зароснутый двір

гусячіма лабками.

Як несподїванї

одлетїли молоды рокы мі

на крылах дикых гусей

до теплых країн.