16. 11. 2022: У Свіднику хотять арендованы квартелї і новы домы

Будованя арендованых квартелїв і приправа локаліты на выбудованя родинных домів суть меджі пріорітами міста Свідник у новім функчнім періодї.

Як про аґентуру TASR повіла пріматорка Свідника Марцела Іванчова, котра в октобровых комуналных вольбах обгаїла свою функцію, зреалізовати хотять і проєкты, котры были уж підпорены.

Меджі послїднїма підпореныма проєктами є і проєкт реґенерації а реконштрукції внутроблоку майже в центрї міста, котрый має змінити ся на оддыхову зону. До роботы ся хотять пустити на ярь слїдуючого року.

У высокім штадію суть подля пріматоркы розроблены і далшы проєкты. „Наприклад заряджіня соціалных служеб. Приготовили сьме проєктову документацію, маєме платне ставебне позволїня, додавателя, котрый выграв конкурз, і моментално сьме подали жадость як єдна з першых самосправ в рамках плану обновы,“ приближыла Іванчова з тым, же далшым проєктом є выбудованя комунітного центра на Фестіваловій уліцї, котра находить ся коло амфітеатру.

„Робиме і на проєктї арендованых квартелїв, де выникне в будові бывшого інтернату 52 арендованых квартелїв. Будеме жадати підпору із Штатного фонду розвоя бываня. Єдночасно зачінаме приготовлёвати локаліту на будованя родинных домів. Подля перераховань бы мало іти о веце як 40 родинных домів,“ інформовала пріматорка.

За словами Іванчовой, в попереднім функчнім періодї місто зреконштруовало історічно найвеце пішників, драг, вытворило ся майже 80 місць на паркованя.

„То вшытко і вдяка тому, же сьме засновали Соціалный подник міста Свідник і у сполупраці з Технічныма службами міста Свідник собі знаме много з такых дїл зробити у властній режії, і за барз про місто прязну цїну.“

В рамках одпадового господарьства місту подля пріматоркы подарило ся зменшыти множество комуналного одпаду так, же просто шпорить і на тім, же не вывозить одпад на складку, але звекшує міру сепарованя. Іванчова вірить, же такый тренд подарить ся утримати і в слїдуючім роцї.

Як повіла, розрахунок міста залежыть од того, як є місто успішне або неуспішне в проєктах. В минулім функчнім періодї мав Свідник за словами пріматоркы успішны проєкты за майже пять міліонів евр. В середнїм чіслї розрахунок міста є коло 10 аж 11 міліонів на рік.

Петро МЕДВІДЬ, ЛЕМ.фм. Ґрафічна і языкова коректура: АРК в СР.