16. 12. 2023: ПСК нагородив особности і Підкарпатьске воєводство
В четверь, 14-го децембра 2023-го року, на Великій сценї Театру Йонаша Заборьского в Пряшові одбыла ся святочна церемонія удїлёваня Премії Пряшівского самосправного краю (ПСК) за 2023-ій рік i Премії председы ПСК.
Меджі нагородженыма тот рік нашов ся і фолклорный колектів а черезгранічный партнер краю. Пряшівскый край удїлёванём оцїнїнь оддав честь особностям і колектівам, котры помогли ку розвитку реґіону дома і в загранічу в різных областях жывота.
Не зістали сьме лем дома
„Я гордый, же в Пряшівскім краю маєме такы вынятковы особности і колектівы, котры своїма намагами, завзятостёв і твердов роботов досягли в жывоті великы діла,“ повів председа ПСК Мілан Маєрьскый.
„Но тот рік не зістали сьме лем дома, перекрочіли сьме граніцї нашой країны, і за довгорічну сполупрацу сьме оцїнили і нашого польского партнера з Підкарпатьского воєводства. Вірю, же тота сполупраца буде єднако добра і хосена мінімално далшых 15 років,“ продовжовав жупан Маєрьскый.
Премію Пряшівского самосправного краю дістала композіторка і музикантка Любіця Чековска, Фолклорный колектів Врановчан і професорка Анна Еліяшова. Лавреатом Премії председы ПСК став лісник і охранарь Мікулаш Міхелчік, выдаватель, поет і перекладатель Петер Мілчак а Підкарпатьске воєводство.
Нагороджене воєводство
Пряшівксый самосправный край капчать із Підкарпатьскым воєводством довгодоба сполупраца, а по 15-ёх роках і інтензівне приятельство, пише ся в білтенї, якый быв з нагоды удїлёваня оцїнїнь выданый.
Обидва реґіоны довгодобо сполупрацують на сполочных актівностях в рамках черезгранічных інштрументів Европской унії, іде головно о піпдору проєктів у области драговой інфраштруктуры, охраны природной і културной дїдовизны, турізму, освіты ці жывотного оточіня.
„Взаємны контакты на обидвох боках суть силны і жывы, не зіставають лем на папери ці на уровни офіціалных форумів. Наопак, мають барз конкретну подобу актівностей заміряных на взаємну пропаґацію і підпору. Резултатом є сполочна участь на різных подіях, якыма были наприклад стрїчі в рамках меджівладных комісій, моніторінґовых комітетів черезгранічных проґрамів, як і в контекстї подій Ініціатівы трёх морь ці Catching-up Regions,“ інформує ПСК.
„Пряшівскый самосправный край собі єдночасно высоко важыть анґажованость Підкарпатьского воєводства при укрїпляню позіції Карпатьского реґіону і Карпатьской стратеґії в рамках Европы.“
У партнерів із Підкарпатьского воєводства собі край цїнить і актівный приступ, коректны односины, котры пересягли рамкы формалных контактів, а суть барз щіры і сердечны.
Петро МЕДВІДЬ, ЛЕМ.фм, языкова і ґрафічна управа: АРК в СР
