16. 2. 2022: Амфітеатр в Креници як Opera House в Сидней

Неодолга під Парковом Гором в Креници зачне ся будова важной для розвитку курорту інвестициі. Афмітеатр в Креници побудуют при ул. Никыфора Креницкого, близко нижньой стациі колейкы на Паркову Гору.

Має мати задашену сцену з простором 100 квадратных метрів і тисяч сідячых місц для публикы. Проєкт навязує до Opera House в Сидней, а задашена част – до креницкых віллі при Бульварах Дітля.

О вознесіню задашеного амфітеатру бесідували в місті уж од років. Головні з огляду на брак концертовой салі потрібной хоц бы для Фестівалю Яна Кєпуры. Вчас того рода подій ци концертів хоснуют розкладану сцену, котра не сполнят вымогів і ролі нормальной сцены. В звязку з тым в 2019 році оголосили конкурс на проєкт обєкту, котрый выграло Biuro Projektów TRZ.

Середкы на побудуваня аміфтеатру, близко 10 млн зл, походят з проґраму Польскій Лад. На тот момент власти ждут на консерваторскє рішыня і позволіня на будову. Бургомайстер Крениці Пьотр Рыба закладат, што позволіня поведе ся здобыти іщы в квітни/апрілю.

В заміріню буде то постійне місце, де будут орґанізувати вшыткы культурны подіі в терміні од мая до жолтня/октобра, без конечности возношыня розбераной сцены на головным тротуарі при пияльни. Амфітератр буде чыслил 1000 місц, з чого 300 місц і сцена будут під дахом. При сцені находити ся будут іщы тоалеты і ґардеробы.

«Обєкт побудуют м.ін. з кабльового бетону і зо сталі, значыт як в Opera House в Сидней, завдякы тому отримаме такы ефектовны формы. Задашена част буде імітувала задашыня, якє находит ся при Бульварах Дітля» – пояснят бургомайстер і додає, што консерватор памятників згодил ся на задашыня єдной третьой обєкту.

Сцену амфітеатру схоснуют тіж до декоруваня спортовців в часі ІІІ Европейской Олимпіяды в 2023 році.

Наталія МАЛЕЦКА-НОВАК, Лем.фм. Фот. Biuro Projektów TRZ

(Публікуєме в оріґіналї – лемківскім варіантї русиньского языка.)