16. 2. 2024: Новы ноты про трубы пропаґанды

Не очекую велику зміну, але холем новы ноты про трубы пропаґанды

Послїднї днї є бізовно єднов із найкоментованїшых тем у медіях по цїлім світї інтервю, котре зробив Трампів пропаґандіста, означовaный за конзерватівного пoлітічного коментаторя, Такер Карлсон із російскым презідентом Путіном. Уж ся якбач повіло вшытко, но не є то так цалком правда.

Є траплїнём позерати інтервю Карлсона з Путіном, але не є то аж таке марне, ани нуда, як уж єм собі прочітав у дакотрых статях. Бо у тых веце як двох годинах брехнї, несмыслїв і болота мож найти і якусь перлу. З русиньского погляду цалком конкретну.

Путін на початку інтервю намісто одповіданя на вопросы вырїшыв дати Карлсонови велику лекцію „історії“, жебы він, але головно люде на Западї, котры то будуть смотрити, знали, де аж суть „історічны руськы теріторії“. Самособов, історія то была така, жебы пасовала до ёго образу світа і думаня, котрым оправдать свої войновы злочіны.

Кедь ся „од Палеоліту“ конечно дістав аж ку Українї по Другій світовій войнї, спомянув, же Україна має теріторії на западї державы вдяка Сталінови, і были взяты Полщі, Мадярьску і Румунії. Карлсон ся позвідав, ці бы Мадярьско могло робити собі претензії на свої історічны теріторії, што Путін припустив, но, за ёго словами, ниґда о тім з Орбаном не бісїдовав. Хоць, як повів шеф Кремля, дотеперь там жыють Мадяры а „хотїли бы ся вернути до отцюзнины“.

Іншак, тото є далша лож, бо і подля баданя з 2020-го року, котре публіковав аналітік і директор Інштітуту централноевропской стратеґії Дмитро Тужаньскый, лем у 5,5 процента жытелїв области были даякы „сепаратістічны“ тенденції, причім штатістічна хыба того баданя была на уровни 4,4 процента. Но вернийме.

Путін додав і „мілу“ особну історію, як колись початком 1980-ых років ішов автом через Совєтьскый союз, а пришов аж до Закарпатьской области Україны. В Берегові были мадярьскы написы, і відїв чудно пообліканых людей з калапами, о котрых думав, же то артісты, но хтось му пояснив, же то Мадяре.

Путін хоснує лож як робочу методу давно, іншак тому не было ани в тім інтервю, і то в многых припадах. А даколи не повість цїлу правду, з тым самым цїлём, жебы ёго „історічный“ екскурз пасовав до ёго політікы.

Зато Путін, великый історік, не збачів, же Підкарпатя Москва не взяла Мадярам, і подаровала Українї, але взяла Чехословакії. Бо войновы рокы суть мадярьсков окупаційов Підкарпатя, не приєднанём ся до Мадярьска. Но є ту омного важнїшый момент.

Путін быв почас комунізму на Підкарпатю, вiдíв Мадярів, але Русинів не збачів. Не спомянув їх ани словом. А на теріторію бы могло мати претензії Мадярьско, не даякы Русины, про котрых то досправды історічна земля. Русины в цíлім інтервю, ани кедь ся бісíдує о їх землí, не суть спомянуты ани раз.

Оно бы то не было чудне, не быв бы то ани першый, ани послїднїй політік, котрый рядить світову могучость, і котрый на Русинів собі ани не спомяне, кедь обще о них даколи дашто чув. Но в контекстї довгорічной україньской пропаґанды є то, же Путін Русинів ани не спомяне, барз важне.

Рокы слухаме, же наш возродный рух, наш народ, є „рука Москвы“, „московскый конштрукт“, же сьме „плачены“ Москвов, Путіном, а могли бы сьме продовжовати. А кедь Путін по двох роках войны дасть великый розговор про Запад, а прийде на тему Закарпатьской области Україны, путник з автомобілом, „наш спонзор“ і „шеф“, собі на нас ани не спомяне.

Окрім того, же Путін, і кедь о тім сам може ани не знать, в інтервю з Карлсоном непрямо вказав, же Русины не суть абсолутно темов, о котру бы ся Москва інтересовала, а уж нияк, жебы то рядила, вказує тота часть розговору і на далшый, не менше важный факт.

Рокы мусиме поясняти, же із самозваным „премєром Републікы Підкарпатьска Русь“, Петром Ґецьком, не має наш рух абсолутно ніч, і же од Русинів і їх релевантных орґанізацій він не має жадной леґітімности. По тім, што собі при темі Закарпатьской области і того, хто може мати претензії на тоту теріторію, не спомянув на „премєра“ ани Путін, хоць Ґецько і по початку повноформатовой войны кликав про свторїня републікы, то вызерать так, же Ґецько леґітімность не має ани в Москві.

Вопрос пак зістає лем єден, і то, хто властно выробив Ґецька, і кому мала така діскредітація русиньского руху служыти?

Путін в інтервю з Карлсоном потвердив, же наш рух, наш народ, ани здалека не має ніч довєдна з Москвов, а він о нас може не має ани зданя. Не очекую велику зміну в україньскій пропаґандї што до темы Русинів, але холем новы ноты про трубы пропаґанды бы в Кієві написати могли. Бо співанцї о Москві уж теперь досправды можуть вірити лем глухы.

Петро МЕДВІДЬ. Статя была написана як коментарь „Вступне до контроли“ лемківского радія lem.fm. Языкова і ґрафічна управа: АРК в СР.