16. 4. 2023: Велика реконштрукція музея Енді Варгола зачала
Роботы мають тырвати 18 місяцїв.
Пряшівскый самосправный край (ПСК) в пятніцю, 14-го апріля 2023-го року, переданём ставбы зготовителёви офіціално спустив проєкт компексной реконштрукції Музея модерного уменя Енді Варгола в Меджілабірцях. Інформовала о тім Даша Єленёва, говоркыня ПСК.
До великой інвестічной акції за майже 12,3 міліона евр дає край фінанції з властного розрахунку і дотацію од державы. Велика модернізація має принести оріґіналну ставбу, многы мултімедіалны і інтерактівны елементы а векшу атрактівност музея, але і реґіону.
Інвестіція народного характеру
Замір на велику реконштрукцію меджілабірьского музея выникнув іщі у 2019-ім роцї і здобыв підпору державы, котра на проєкт на початку выдїлила 7,1 міліона евр.
В часї, коли творила ся проєктова документація потребна на реалізацію, цїны наросли і вытраты на реконштрукцію радікално пішли горї. Наконець вытраты наросли на 12,3 міліон евр, причім з Міністерства фінанцій Словацькой републікы піде лем 5,1 міліона а ПСК зафінанцює перебудованя сумов 7,2 міліона евр.
„Цїлый проєкт мав властно складный вывой, но основным є, же сьме з крайскыма посланцями нашли згоду – тот музей собі залужыть значну інвестіцію, нелем частковы оправы і звычайны реконштрукції,“ повів Мілан Маєрьскый, председа ПСК, (на фотцї третїй справа), котрый є зряджователём музея Енді Варгола.
„Зачінаме з реалізаціёв унікатной ставбы, котра має надреґіоналный, майже народный характер. Бісїдуєме о єднім з двох світовых музеїв, котрый має величезный потенціал про презентацію міста, края і Словакії. Інвестіція є вызначна і з погляду розвитку реґіону, підпоры турістічного руху ці бізнісового оточіня,“ продовжовав Маєрьскый.
Нова фасада і голоґрафія
Нова тварь музея бы мала корешпондовати з унікатным значінём і одказом краля поп-арту. Реконштруовати ся буде фасада, просторы, выбудує ся приставба і надставба.
Перебудова має принести інтеркатівность, аплікацію світловых, проєкчных, звуковых і голоґрафічных технолоґічных елементів, включно презентації уменя в екстерьєрї на терасї, яка буде на стрїсї, фасадї будовы, як і на новій площі, котра выникне перед будовов. Цїла реконштрукція бы мала тырвати 18 місяців.
Музей модерного уменя Енді Варгола дотеперь мав просторы в будові, котра была збудована як културный дім і довгодобо не повнила функцію модерного музея в контекстї творів Енді Варгола. Будова з 1980-ых років была перестарїла і технічный стан вже не быв добрый про заміры зряджователя і музейників.
„Модерзнізація обєкту принесе фундаменталне розшырїня ґалерії і депозіту, выникнутя новых ательєрів, екслузівный простор про освітнї проґрамы, аж по інтереснїшы експозіції. Скелет будовы буде дотвореный респонзівнов фасадов, з котров є повязана цїла есенція візуалу і унікатного скапчаня екстерьєру з інтерьєром. Выразно змодернізованы експозічны просторы, бістро, оддыхова зона з посиджіньом, стріха з амфітеатром про 100 людей, і много інтерактівных а мултімедіалных елементів, вірю, принесуть навщівникам музея дакількократно богатшый зажыток, як дотеперь,“ доповнив директор музея Мартін Цубяк (на фотцї другый справа).
Музей ся переніс до другой будовы
Музей модерного уменя Енді Варгола є дочасно перенесеный до деташованого працовиска будовы бывшой ґімназії в Меджілабірцях, причім творы суть забезпечены в депозітах. Хоць музей буде почас реконштрукції запертый, актівности будуть робити ся дале.
Музей приготовлює веце загранічных выстав у Словенії, Хорватії, і ку кінцю рока в просторах Европской централной банкы у Франкфуртї. В рамках Словакії суть напланованы выставы концепту Warhol Tour, і то в містах Стропків, Снина і Гуменне. Реалізовати ся будуть експеріменталны выставны, едукачны і інтересны онлайн проєкты.
Петро МЕДВІДЬ, ЛЕМ.фн, ґрафічна і языкова управа: АРК в СР
